Mentre que l’Estat francés plora la mòrt d’un legionari abatut dimars passat dins la Guèrra de Mali, lo jornal amazigh Tamazgha.fr planh d’exaccions sus las populacions civilas, mai que mai toarègs, de la part de l’armada maliana, qu’aprofiècha la preséncia francesa per complir melhor aquela deplorabla mission.

Segon Tamazgha.fr, l’Associacion dels Refugiats e Victimas de la Repression d’Azawad (ARVRA) recep cada jorn de testimoniatges sus divèrsas exaccions perpertradas dins lo país toarèg per l’armada maliana. Los camps de refugiats dels estats vesins, sustot en Mauritània, son preses per assaut: de refugiats arriban en fugissent en massa las exaccions, dont de nombrosas femnas e enfants qu’an assistit al massacre de lors parents.
 
Diluns passat, se debanèron de manifestacions a Kidal en protèsta contra aquelas exaccions e per exigir l’intervencion de la comunautat internacionala per tal de metre fin a aquela barbariá.
 
Segon la redaccion del jornal amazigh, “totas aquelas injustícias son possiblas a causa de la preséncia de l’armada francesa en Azawad, aquela armada francesa qu’a permés als barbars de l’armada maliana d’atacar las populacions civilas e las personas vulnerablas”.
 
Lo meteis jornal publica una lista de 68 oficials toarègs de l’armada maliana que son estats cancelats e arrestats per “traïson a la pàtria”.