L’ora es grèva: las novèlas mesuras sanitàrias pausan tornar de problèmas financièrs als clubs de XIII. Es pas tant la question de las limitacions de public qu’es en causa (o pòt èsser pels Dragons e pel TO) coma la barradura dels estanquets e l’impossibilitat d’organizar de repaisses e recepcions abans e aprèp las partidas, e doncas mens de dintradas de moneda.
 
La Federacion lança en aquesta debuta de setmana una concertacion amb los clubs per saupre se se repren las competicions dins las condicions novèlas o se s’imagina un repòrt d’aquesta represa e un calendièr novèl.
 
 
Refortir lo collectiu
 
Cada an, l’enquadrament dels Dragons trapa una activitat originala en avantsason per refortir l’ententa del grop. Ongan, los jogaires anèron remar del costat de Sant Cebrià de Rosselló. Faguèron una sortida en mar amb los membres del Collioure Sportif Aviron, un club de rema tradicionala que ganhèt lo darrièr campionat de França de la categoria. Recampats dins la lòna de Sant Cebrià, beneficièron d’una orada d’aprendissatge d’un espòrt que demanda de qualitats atleticas, e tanben un esperit d’esquipa e de coesion. Los grops de 6 jogaires acabèron la matinada per de corsas dins la lòna.
 
Lo novèl menaire de joc dels Sang e Aur, Mitchell Pearce, es arribat d’Austràlia e s’es entraïnat amb sa novèla esquipa.
 
 
La bona annada tretzista
 
Vos desiram una bona annada plan esportiva, plan tretzista e plan occitana. Cal remandar los adversaris dins lors 22 e los empachar de ne sortir! De nòstre costat, setmana aprèp setmana, contunharem de vos faire viure l’epopèa del XIII!
 
 
 
 
Alan Roch