La Federacion Regions e Pòbles Solidaris (RPS) presentèt dimècres a París un manifèst amb setanta proposicions per que l’estat francés venguèsse una republica federala. Aquel document serà la basa del programa de la federacion a las eleccions legislativas que venon, amb la tòca d’aumentar sa representacion —cinc representants a l’Assemblada Nacionala francesa—, mas aquel partit vòl tanben influir sul debat politic d’abans l’eleccion presidenciala d’abril.
 
Dins aquel sens, après dos ans de pandemia, RPS remarca que la crisi sanitària a reversat la vida de totes los ciutadans e a fach veire las feblesas de l’estat francés dins totes los domenis: santat, economia, vida democratica, etc. “Per superar la pandemia e afrontar los enjòcs environamentals e climatics, es necite de cambiar de paradigmas e de far pròva de resiliéncia”, çò explica la formacion.
 
A la presentacion del manifèst an participat lo president de la federacion, Gustau Aliròl, e los deputats Paul Molac —impulsor de la lei de defensa de las lengas minorizadas— e Jean–Félix Acquaviva, que fan partida del grop parlamentari Libertats e Territòris dins l’Assemblada Nacionala francesa.
 
La federacion Regions e Pòbles Solidaris amassa una tretzena de formacions politicas del Bascoat, de Catalonha Nòrd, Bretanha, Corsega, Alsàcia e d’Occitània.
 
 

Conf presse RPS à Paris pour présenter sa plateforme programmatique en vue de 2022. Modification constitution pour nouvelle organisation des territoires, pour respecter les cultures régionales et pour une république fédérale où l’autonomie de la Corse sera de plein droit.@RetPSpic.twitter.com/yXa9UmH5dR

— François Alfonsi (@F_Alfonsi) January 5, 2022