Dídac Cerezo, lo collaborador de Jornalet qu’es en Brasil amb la comission internacionala velhant pel drech dels indians guaranís kaiowás de recuperar lors tèrras, ven de nos raportar un cas esmovent.
 
Dissabte passat, tres joves guaranís kaiowás del vilatge de Tey’ikue, dins la municipalitat de Caarapó, foguèron perseguits per tres tuaires mentre qu’anavan pescar. Dos capitèron de fugir, mas Denilson Barbosa, dins sos 15 ans, foguèt assassinat amb tres còps de fuòc al cap e un al còl. Lo còrs de l’adolescent foguèt trobat dimenge de matin sus l’estrada, a 7 quilomètres del vilatge.
 
Totas las sospièchas visan lo fazendeiro Oladino, un grand entrepreneire agricòla que se sap qu’el tanben engatja d’esbirros armats nomenats jagunços per extorquir los indigènas e empedir que fagan usatge del drech legal qu’an de recuperar lors tèrras, qu’òm los levèt pendent la dictatura.
 
Per protestar contra l’assassinat del jove Denilson, mai de 500 guaranís kaiowás son a l’ora d’ara a ocupar lors tèrras, ont lo fazendeiro Oladino es installat.
 
Lo clima es lo de la tension, per aquela recuperacion de la tèrra indigèna. An paur de novèls assassinats dels jagunços. Pasmens, an pres la ferma decision de resistir en protèsta contra aquel darrièr assassinat e en defensa de lor territòri, e per la dignitat del jove assassinat.
 
Los indigènas denóncian la passivitat de l’estat. Pas manco la Fondacion Nacionala de l’Indian (FUNAI) es anada sul luòc del crime; e la polícia i anèt sonque per ne far lo rapòrt, e mai se lo Parquet General de la Republica garentiguèt l’enviada de la Fòrça Nacionala dins la region per fin de protegir los indigènas de las menaças de mòrts.
 
Los guaranís kaiowás demandan de sosten e de solidaritat. Que los que sián près s’acampen amb eles, e que los que sián luènh fagan difusion de lor situacion. Segon Cerezo, los fazendeiros an paur que lo conflicte e s’internacionalize, e la difusion internacionala es la melhora arma dels indigènas.