Cal aver lo moral d’aquesta passa per preparar de manifestacions publicas. Aqueste dissabte de ser 8 de genièr, coma la covid pertocava de membres del grop, un concèrt de La part de l’auratge de Barrut èra anullat a Campendut. Èra ja un repòrt d’una programacion de novembre de 2020 que se tenguèt pas en rason de mesuras de confinhament.
 
L’associacion Fasètz la lenga en Cabardés pòt pas téner son AG annadièra fixada al dimars 18 de genièr: la comuna d’acuèlh prevista a barrat totas las salas municipalas dusca a la fin del mes.
 
E se pòt multiplicar los exemples…
 
 
Las Ampelofoliás vos espèran
 
Mas lo mitan associatiu refusa de plegar los braces e, tot en seguissent los reglaments sanitaris e las divèrsas mesuras d’organizacion, s’esperfòrçan de concretizar qualques rendètz-vos.
 
La jornada bèla de las Ampelofoliás de Cabardés, fèsta de la trufa negra e dels vins del terrador, se debanarà a Mossolens lo dimenge 23 de genièr. Per la segonda annada, lo camp del mercat del terrador serà redusit. Un espaci delimitat (ont caldrà presentar lo passador sanitari) permetrà de tastar los vins, pro d’èsser assetats (es interdit de beure dreit!). La musica enlevada de Tarabastar balharà un aire festiu e gaujós a la manifestacion.
 
La debuta del mercat especific de la trufa negra èra tot un ritual en debuta de vèspre. Moment d’un còp de fiulet o de fusilh de dobertura esperat per una fola d’amators esquichats. Ongan, lo mercat se tendrà sens interrupcion de 10 oras del matin a 5 oras del vèspre amb la distanciacion necessària. Activitats pels mainatges, demostracions de cavatge e de poda, vesita del conservatòri truficòla, etc. completaràn lo programa.
 
Adieu tanben als entrepans de meleta o de magret, los bolats de sopa manjats per carrièras. L’associacion prepausa de reservar un “grand trufat”, un platèu repais amb de trufa de la debuta a la fin: velosat coja-castanhas amb sa crèma trufada; una quicha a las sant-jaumes bretonas, Bethmala e trufa de Cabardés, preparada pel cap estelat Jiròni Ryon del restaurant La Barbacana (Ciutat de Carcassona); Brie trufat; ris a la lait trufat. E los lipets mancaràn pas de crompar lo vin d’acompanhament indispensable al prèp dels vinhairons presents (11 de Cabardès e un de Blanqueta de Limós)!
 
Los mai valents e las mai valentas auràn pogut participar a un obrador de cosina trufada tre lo dissabte 22 de matin a Ventenac de Cabardés per preparar: macaron de fetge gras trufat; uòu trufat en balotina, crèma de campairòls; suprèm farcit de polalha amb pastas frescas trufadas – formatge de sason e trufa, ensalada; maridatge chocolat blanc e melanosporum!
 
 
Seta e Arièja a las Ivernalas de Cabardés
 
En parallèl, l’Institut d’Estudis Occitans d’Aude prepausa dos rendètz-vos de las Ivernalas de Cabardés a Puègnautièr (sala Na Loba).
 
D’en primièr, dissabte 22 de genièr, a 6 e mièja del vèspre, Felip Carcassés e son grop Còrna d’Auròc vendràn cantar las adaptacions occitanas dels tèxtes de Jòrdi Brassens: una òbra de tria, plan capitada.
 
Segond moment lo dimars 25 (6 e mièja del vèspre, tanben). Jol titol Arièja, mon país, Pascala Respaud, acompanhada musicalament per Ramon Gargallo, contarà e cantarà Arièja: istòrias vertadièras o inventadas, contes dels jorns e istòrias de las nuèits, cançons de trabalh e musicas de fèsta, etc.
 
 
 
 
 
Alan Roch