L’inseguretat en Mali es de mai en mai inquietanta, la penúria d’aliments es la pus grèva dempuèi 2014 e lo futur del país perilha, çò denoncièt dimars lo representant de l’ÒNU, El-Ghassim Wane. “L’inseguretat s’es espandida, la situacion umanitària s’es deteriorada, mai d’enfants van pas a l’escòla, e lo país es afectat per un cicle interminable d’inestabilitat”, çò precisèt lo foncionari.
 
L’ÒNU prevei que mai d’1 800 000 personas auràn de besonh d’assisténcia alimentària en 2022. Aquò es mièg milion de mai de personas qu’en 2021. Mièg milion es tanben lo nombre d’enfants que son demorats sens educacion a causa dels barraments de las escòlas.
 
Sus aquela draia, Wane raportèt que l’actual govèrn de transicion de Mali èra en conflicte amb la Comunautat Economica dels Estats de l’Africa Occidentala (CEDEAO), çò que fa venir pus malaisit l’avenir del pais. “Un estancament esperlongat dificultarà una sortida pachada per consens, del temps qu’aumentarà las dificultats per la populacion e afeblirà encara mai la capacitat de l’estat”, çò diguèt lo delegat de l’ÒNU.
 
Lo 3 de decembre passat, 32 civils moriguèron près de Songho dins un atemptat contra l’autobús ont viatjavan. Demest los mòrts i aviá 26 femnas e enfants. Lo nombre dels desplaçats interiors es passat de 216 000 a mai de 400 000.
 
Mali es governat pel general Assimi Goïta, investit president après lo còp d’estat que lo faguèt lo 24 de mai de 2021. Abans aquel putsch, ont se detenguèt lo president interimari, son primièr ministre e lo ministre de la defensa, Goïta aviá dirigit un soslevament armat que capitèt a tombar l’executiu d’Ibrahim Boubacar Keïta.
 
Vestit de son unifòrme militar, Assimi Goïta prometèt, dins son discors, d’“organizar d’eleccions crediblas, justas e transparentas dins lo relambi previst, en respectant los engatgaments internacionals”. Lo tèrme previst per aquelas eleccions es lo 27 de febrièr de 2022.
 

Mali: “Insecurity has expanded, the humanitarian situation has deteriorated, more children are of out of school & the country has been affected by an endless cycle of instability.”

-- @UN_MINUSMA head @elghassimw to Security Council. https://t.co/AxMBcSjBmx

— United Nations (@UN) January 11, 2022