A comptar deu 1r d’abriu qui vien, la cadena de supermercats Monoprix, presenta dens la màger partida de las regions occitanas, ne venerà pas mei ueus de poras neuridas en cauja. Aquesta decision que s’ei presa au darrèr d’ua luta ahiscada miada per L214, ua associacion de defensa deus animaus destinats a l’alimentacion umana.
 
Desguisats de porets gigants a l’entrada deus magazins Monoprix, los militants de L214, au cors deus darrèrs quinze mes, qu’an hèit informacion sus las condicions de neurissatge de las poras, distribuit tractes e hèit signar ua peticion qui a recebut mei de 27 000 signaturas, entà demandar a Monoprix de deishar de véner los ueus sortits d’aqueths lòcs de neurissatge.
 
Despuish lo 1r de genèr passat, ua directiva europèa qu’obliga los neuridors a amainatjar las caujas de mòda que cada pora e dispause d’un espaci de 750 cm². La tòca de la navèra reglamentacion qu’ei que las poras e poscan complir las lors necessitats fisicas e comportamentaus, mes divèrs Estats europèus, dont los Estats francés, espanhòu e italian, que tardan a l’aplicar, e de tota faiçon que demora hèra insufisenta aus uelhs deus defensors deu plan-estar animau.
 
En França, 80 % deus ueus produsits que son de poras en cauja, totun qui la grana distribucion ne’us comercializa pas mei en Alemanha, en Belgica e aus País Baishs. Dens aqueths país, que subsisteish totun ua produccion de ueus de poras en cauja destinada a l’industria agroalimentària.
 
La reglamentacion europèa qu’obliga los productors a indicar sus cada ueu un còdi (un exemple ací) atribuit au lor espleit. La prumèra chifra d’aqueth còdi qu’indica lo tipe de neurissatge d’on vien: atau, lo còdi productor que comença per 3 entà un neurissatge en cauja, per 2 entà un neurissatge au sòu, per 1 entà un neurissatge a l’aire libre, e per 0 enfin entà un neurissatge a l’aire libre segon la reglamentacion de l’agricultura biologica.
 
 
 
 
Eric Gonzales