Lo govèrn australian a decidit de retirar lo visat al tenista Novak Đoković e l’a expulsat de l’Illa Continent. Lo ministre de l’immigracion australian s’es servit del drech que li autreja la Constitucion que li permet de poder rebutar un passapòrt sens aver de prene en compte çò que ditz la justícia. Per tant, Đoković poirà pas jogar l’Open d’Austràlia, que comença diluns.
 
Lo fulheton comencèt lo 6 de genièr, quand la polícia de l’aeropòrt de Melbourne li levèt lo passapòrt. Segon la lei australiana, complissiá pas las requerenças sanitàrias del país perque èra pas vaccinat contra la covid-19. Alavetz, l’esportiu faguèt apelacion davant la justícia e, diluns passat, la cort federala de Melbourne li permetèt l’intrada dins lo país. Đoković recuperèt lo passapòrt e poguèt començar de s’entraïnar per l’eveniment que comença diluns venent. Ça que la, mancava de superar un darrièr obstacle, lo del govèrn. Lo ministre de l’immigracion a la competéncia de poder rebutar de passapòrts e ièr se prononcièt: “Ai exercit mon poder en vertut de l’article 133 de la Lei de l’Immigracion per anullar per de rasons de santat e de bon òrdre lo visat que l’aviá Sénher Novak Đoković, d’o far èra d’interès public”, çò diguèt lo ministre.
 
Lo govèrn australian vòl plaçar lo tenista en retencion a partir d'uèi. L’esportiu poirà solament assistir a l’audiéncia que se tendrà aquesta dimenjada per analisar lo darrièr recors del tenista.

De son latz, lo primièr ministre australian, Scott Morrisson, a dich que “los australians an fach fòrça sacrificis pendent aquesta pandemia, e desiran amb rason que lo resultat d’aqueles sacrificis siá protegit”.