Aqueste dimars 11 de matin, dins una conferéncia de premsa tenguda a París, lo primièr ministre Joan Castèths, acompanhat de la ministra dels espòrts Roxana Marcineanu, oficializèt la tenguda de las Copas de Mond de 2025 de rugbi de XIII en França.
 
Una competicion juniors s’ajustarà a las Copas dels òmes, de las femnas e del XIII-cadieral. Aquò vòl dire 16 formacions per competicion e 128 partidas de jogar en octòbre e novembre de 2025 sul territòri francés.
 

 
D’en primièr, òm se pòt regaudir del retorn de la competicion creada per Paul Barrière en França aprèp las edicions de 1954 (la primièra) e de 1972 e la coorganizacion de las Copas de 2000 e 2013 amb los britanics.
 
Se pòt somiar del lum que se metrà sus nòstre espòrt. La competicion se plaça dins la continuitat de la Copa del Mond dels cosins quinzistas en 2023 e dels Jòcs Olimpics de París de 2024.
 
L’idèa prepausada es qu’un quarantenat de vilas mejanas reçaupràn de partidas e de camps d’entraïnament sus tot lo territòri exagonal e pas solament dins la zòna occitanocatalana; solas las mièjas finalas e finalas se tendrián dins de metropòlis.
 
Espandir lo territòri de la practica es lo desir de tot tretzista, mas aquò serà pas de faire al detriment de las contradas istoricas.
 
Se parla d’un budget de 60 milions d’euròs, de 800 000 espectators en tot, de milierats e milierats d’estrangièrs que vendràn, de multiplicacion per 3 dels licenciats e dels clubs, de 2000 joves en formacion qu’obraràn a l’organizacion, etc.
 
Mai d’8 franceses sus 10 serián d’acòrdi per reçaupre aquelas Copas de XIII, mas se i a 8 franceses sus 10 que seguisson las competicions del XIII?
 
Una vila coma Carcassona s’es estonada que se li demande 800 000 èuros per reçaupre una manifestacion de la competicion, alara que lo Torn de França, a las retombadas subrebèlas, demanda solament 250 000 èuros per èsser vila estapa.
 
Lo Comitat d’Organizacion prendrà los contactes amb las collectivitats interessadas per anonciar un debanament mai precís de la competicion a la fin d’aqueste an.
 
Caldrà qu’aquel comitat aja los rens solids, amb mai de biais que la Federacion que trasteja bravament. Mesa en plaça de las competicions, anullacion de la Copa de França, programacion de las esquipas de França, etc. : plan de questions se pausan al quotidian e los tretzistas recebon pas totjorn de responsas claras.
 
 
Elèit 2: Salanca domina Cabardés
 
Lo plan magrinèl programa tretzista de la dimenjada se compausava de tres partidas d’Elèit 2.
 
Dissabte, a Vilagalhenc, lo VARL, en cap del classament, recebiá los Batalhièrs de Pià, invencits. A la pausa, la marca èra de 12 pertot. Dins lo segond temps, los catalans se mostrèron mai inspirats e dinamics que los locals que pareguèron embarrassats. Se lo VARL ajustèt tres ensages e Pià solament 2, lo pè del centre Antòni Durand faguèt la diferéncia amb las transformacions encapadas, mai quatre penalitats que sancionan l’indisciplina dels jogaires de Cabardés: victòria catalana: 32-26. La formacion de Salanca justifica sus la pelena e per la qualitat de son jòc sa volontat de jónher l’Elèit 1 la sason venenta.
 
De son costat, dimenge, Baó bat largament Gratentor 62-8 e Entraigas va ganhar a Vilafranca 32-10. Lo cambiament d’entraïnaire a pas reviscolat los Lops!
 
 
L’Elèit 1 de retorn sus las pelenas
 
Aquesta dimenjada dels 22 e 23 de genièr marcarà la represa del campionat d’Elèit 1 — se la covid o vòl plan – amb la darrièra jornada de la fasa anar. Son al programa las oposicions Lesinhan/Albi, St Gaudenç/Dragonets, Tolosa/Avinhon e Vilanòva/Limós.
 
 
 
Alan Roch