Lo govèrn de Catalonha, menat pel president sobeiranista Artur Mas, a creat una còla d’emergéncia per afrontar la grèva crisi politica qu’afècta lo país catalan. Aquela còla de crisi es formada amb de personal dels departaments de la Presidéncia, de la Justícia e de l’Interior del govèrn catalan. L’origina del conflicte ven d’un possible cas d’espionatge massís contra los principals partits politics catalans, entrepreneires, sindicalistas e jornalistas. Segon divèrsas fonts, una agéncia privada de detectius espièt pendent fòrça ans los elèits catalans; e qualques unes dels salariats de l’agéncia contraròtlan a l’ora d’ara aperaquí 500 rapòrts amb d’informacions fòrça sensiblas. L’afar se deslevèt a partir d’una escampeta jornalistica concernissent l’espionatge contra Alicia Sánchez Camacho, cap en Catalonha del Partit Popular de Mariano Rajoy.
 
Aquel afar, que desvela las presumidas illegalitats fiscalas d’un filh de l’èx-president catalan Jordi Pujol, aluquèt totas las alarmas policièras; e lo Ministèri de l’Interior espanhòl reagiguèt amb l’arrestacion del cap dels detectius privats e de tres de lors salariats. Malgrat divèrses escorcolhs, los rapòrts se son pas trobats e ara son objècte de recèrca prioritària, tant de la part de la polícia espanhòla coma de la polícia catalana, que se disputan l’investigacion. S’agís d’informacions de nauta valor e per aquò, se las disputan tant lo govèrn de Madrid coma lo govèrn de Barcelona, dobèrtament en confrontacion politica.
 
Tot aquò a complicat mai encara un clima politic qu’èra ja pro excepcional a causa del procès sobeiranista catalan. Dins aquel sens, a l’afar dels espions privats, cal apondre lo fach que l’Estat espanhòl a desplaçat en Catalonha qualques 200 efectius de son servici secret, lo Centre Nacional d’Intelligéncia (CNI). E mai se Madrid o a pas confirmat ni desmentit, de fonts de la polícia catalana o asseguran aital, e especifican que fòrça d’aqueles agents son arribats del Bascoat, ont la dissolucion d’ÈTA a fach que lor trabalh aja perdut son sens. Se se confirmèsse que lo servici secret espanhòl opèra contra lo govèrn catalan e los partits sobeiranistas, l’escandal seriá majoral, perque parlariam d’un cas de guèrra lorda dels servicis de seguretat de l’Estat contra un projècte politic democratic.