Lo mèstre del bodisme zen e creator de la plenitud de consciéncia Thích Nhất Hạnh moriguèt dissabte passat a 95 ans dins lo monastèri de Từ Hiếu, dins la vila de Huế, lo còr del bodisme en Vietnam, ont foguèt ordenat monge bodista fa 80 ans.
 
Pendent fòrça annadas visquèt en Occitània, dins lo Vilatge dels Prunièrs, un monastèri qu’el meteis fondèt entre Peiregòrd, Agenés e Bordalés en 1982. Èra vengut en exili per son oposicion a la Guèrra de Vietnam. Martin Luther King l’aviá prepausat coma candidat al prèmi Nobel de la patz per “sas idèas de patz, d’ecumenisme e frairesa mondiala”. En 2014, patiguèt un accident vascular cerebral e tornèt en Vietnam ont s’intallèt al monastèri ont venguèt monge e defuntèt dissabte.
 
Es considerat coma lo portaire a las culturas occidentalas de las tecnicas e terapias de meditacion plena, divulgadas jos lo nom anglés de “mindfulness”, çò es plenitud de consciéncia. A escrich mai d’una centena de libres, de divulgacion e tanben de poesia, que son estats traduches en mai d’una quarantena de lengas. Solament als Estats Units, se calcula qu’auriá vendut mai de cinc milions de libres.
 
Segon lo Dalai Lama, lo melhor omenatge que poscam rendre a Thích Nhất Hạnh es de “contunhar son òbra per promòure la patz dins lo Mond”.
 

The International Plum Village Community of Engaged Buddhism announces that our beloved teacher Thich Nhat Hanh passed away peacefully at Từ Hiếu Temple in Huế, Vietnam, at 00:00hrs on 22nd January, 2022, at the age of 95. #thichnhathanh#Buddhism

— Thich Nhat Hanh (@thichnhathanh) January 21, 2022

 

Venerable Thich Nhat Hanh lived a truly meaningful life. I have no doubt the best way we can pay tribute to him is to continue his work to promote peace in the world. https://t.co/gsmm9KWf0A

— Dalai Lama (@DalaiLama) January 22, 2022