L’armada de Burkina Faso anoncièt diluns la destitucion del president del país, Christian Kaboré, e son remplaçament pel luòctenent coronèl Paul-Henri Sandaogo Damiba. L’anóncia compren la suspension de la Constitucion, la dissolucion del govèrn e de l’Assemblada Nacionala de Burkina Faso, en mai del barrament de las frontièras.
 
Lo tèxt remarca que lo còp d’estat s’es fach sens violéncia e que los detenguts se tròban dins un endrech segur, e anóncia que s’es a alestir un calendièr “acceptable per totes” per far d’eleccions.
 
Lo comunicat es signat per Damiba, autoproclamat president del Movement Patriotic de Salvacion e Restauracion (MPSR), e l’a legit un autre militar, lo capitani Sidsore Kaber Ouedraogo, a la television publica burkinesa, RTB.
 
L’ÒNU a condemnat lo còp d’estat.

 
Format en França
 
Paul-Henri Sandaogo Damiba es diplomat de l’escòla militara de París. En 2017, foguèt entre los oficièrs estrangièrs diplomats de la 24a promocion de l’escòla de Guèrra.
 
Es titular d’un mastèr 2 en sciéncias criminalas del Conservatòri Nacional de las Arts e dels Mestièrs (lo CNAM) de París ont a seguit los corses del criminològ Alain Bauer.
 
Damiba aviá fach partida de l’èx-RSP, lo regiment de seguretat presidenciala de Blaise Compaoré, òme fòrt e autoritari de Burkina Faso de 1987 a 2014, retirat del poder per un soslevament democratic que dissolguèt l’unitat de Damiba e que causiguèt, el, lo camp de la democracia. Un an pus tard, Damiba e d’autres oficièrs se’n desmarquèron dins una primièra temptativa de còp d’estat militar.
 
 
En plen jutjament per la mòrt de Sankara
 
Lo putsch arriba tres meses après que comencèt lo jutjament de l’assassinat del president Thomas Sankara, simbòl del panafricanisme e de la lucha contra lo colonialisme, que foguèt fusilhat per de militars dins la residéncia presidenciala lo 15 d’octòbre de 1987.