Una enquista de The New York Timesa destapat qu’Israèl a tirat profièch politic del logicial d’espionatge Pegasus, que l’auriá emplegat aquel estat per promòure sos interèsses diplomatics dins lo Mond entièr. Lo logicial, proprietat de la societat israeliana NSO Group, es considerat coma un dels mai potents qu’existiscan, e es estat emplegat en de desenas de païses contra de jornalistas, d’activistas pels dreches umans e de dissidents politics. Demest los espionats i aviá lo president de la Generalitat de Catalonha en exili, Carles Puigdemont, e plan d’autres independentistas catalans. Tanben ne foguèt victima lo president francés, Emmanuel Macron, e l’èx-primièr ministre Édouard Philippe.
 
L’enquista revèla que l’exportacion d’aquel logicial es dirèctament contrarotlada pel govèrn israelian e qu’aguèt una foncion essencial per tal d’obténer lo sosten dels païses arabis dins la campanha d’Israèl contra Iran, e per fin de negociar los Acòrdis d’Abraham, qu’en 2020 normalizèron las relacions entre lo país ebrieu e qualques unes de sos ancians enemics arabis.
 
Lo reportatge a tanben desvelat que l’FBI aqueriguèt lo logicial en 2019, malgrat la proliferacion d’informacions que disián que Pegasus èra estat utilizat contra d’activistas e dissidents politics en qualques païses. Arunan, lo Departament de Justícia dels Estats Units e l’FBI aurián decidit de non emplegar pus los produches de NSO Group, e mai lo govèrn nòrd-american n’aja totjorn en sa possession, segon The New York Times.
 
Pegasus es estat tanben un element decisiu per la nauta detencion de criminals coma lo famós narcotrafegaire mexican El Chapo, mas tanben l’an fach servir divèrses regims autoritaris, coma Polonha, Ongria e l’Arabia Saudita, per amudir l’oposicion e perseguir de dissidents. Per aquel motiu, lo govèrn de Biden l’apondèt dins sa lista negra en novembre. Es una mesura que pòt afectar grèvament las operacions d’NSO Group, pr’amor que la societat a de besonh de la tecnologia estatsunidenca per desvolopar sos produches. Lo govèrn israelian a denonciat energicament la decision de Biden, en declarant que qu’èra pas sonque un atac contra lo fabricant e l’indústria de la defensa nacionala mas tanben contra lo quite estat d’Israèl.