Eth darrèr videoclip de Es Paums, que se presentèc dissabte passat, ei un cuertmetratge musicau e tanben un documentari que tracte era hèsta des Barbacans de Canejan, era hèsta d’iuèrn que vire ar entorn dera figura der os.
 
Entitolat Eth balh der os, s’agis deth prumèr trabalh d’ua tetralogia nomenada Artz (deth basc “hartz” que vò díder “os”) que se presente damb sostítols en sièis lengües:
occitan aranés, catalan, castelhan, basc, francés e anglés. Es tèxtes son basadi sus poèmes deth poèta aranés Jèp de Montoya e era musica a estat compausada per Jaume Masana Castet.
 
Enregistrat enes terçons de Quate Lòcs e Lairissa e ena encontrada de Luishon, eth filmet qu’a estat dirigit peth cineasta Jòse Bergés que ja virèc un aute videoclip entà Es Paums est’an passat: Oxitònia.
 
 
Es Barbacans de Canejan
 
Es Barbacans de Canejan qu’ei ua hèsta tradicionau ancestrau arrecuperada en an 2004. Ara manèra mès ancestrau deth carnaval pirenenc, es Barbacans que son uns personatges vestidi damb pèths e còrnes d’animaus coma cèrvis, vaques, ossi… que passegen pes carrèrs en tot hèr a sonar es esqueres que pòrten estacades ena centura.
 
Es Barbacans passegen per Canejan, mentre d’auti personatges espanten ara gent damb un balhon e un liròt lord, o un personatge mascat de hemna en prenhatge que lance cendre ara gent coma simbòl de renauiment dera vida. Era hèsta, mès que mercar eth començament de Quaresma, qu’arrebrembe qu’er iuèrn serà lèu acabat, qu’es animaus gessen des bòrdes e qu’er os ges dera tuta.
 
Eth rituau que s’acabe ena plaça damb era crèma de Magràs, coneishut en Bearn coma a Sent Pançard o en d’auti lòcs damb eth madeish nòm de Carnaval. De hèt, es aranesi nomenten Magràs ad aquera hèsta iuernau d’excèssi, qu’es matuquets o canejanesi e ne diden Barbacans.
 
Eth personatge de Magràs qu’ei cremat dempús d’èster jutjat e que cargue damb toti es maus deth país.