L’artista Joan-Luc Severac es mòrt en aquesta fin de genièr. Sos obsèquis se tendràn a Menèrba aqueste diluns 31 de genièr (rendètz-vos a 9h45 al cap del pont o a 10 oras a la glèisa).
 
Son escultura mai coneguda es sa colomba de lutz a Menèrba, per un monument de pèira Als catars. Explicava: “Es una escultura de lutz, un signe solar, un monument de la patz. La lutz, lo solelh e la patz son las fòrças que lo catarisme voliá representar. Los catars s’èran elevats a l’ensús de la matèria. Vaquí perqué ai pas fait una colomba de pèira, mas una colomba de lutz. La lutz, valent a dire l’ausséncia de matèria, es la sola causa que pòsca simbolizar lo catarisme.”
 
Realizèt tanben un Crist de fusta per la glèisa. Èra a l’encòp pintre, escultor e gravaire.
 
Èra nascut lo 16 de novembre de 1936 a Cabestanh.
 
Passèt doas annadas coma professor a Garait, mas tornèt lèu al país lengadocian. Creèt amb d’amics plasticians lo Grop Menèrba. Amb la femna Maria-Teresa, filha de Menèrba, trasformèron l’ostal de familha en centre d’art, nomenat Sant Rustic, per mostrar lors òbras.
 
En 1974, illustrèt l’obratge Le Petit Livre de Minerve d’un autre enfant de la tèrra menerbesa, Leon Còrdas. En 2018, es lo libre de poèmas de Gerard Zuchetto Entrebescs e cançons (ed. Troba-Vox) qu’illustra. Los dos amics presentèron mai d’un còp l’obratge comun, coma al CIRDÒC (novembre de 2018) o per las Febrejadas de l’Ostal Sirventés (Carcassona, febrièr de 2020). Malaut, l’artista inventa un biais de gravar que li demanda mens d’esfòrç fisic per exprimir sa volontat permanenta de creacion.
 
Se totes los artistas pòrtan una part d’universal, se d’autres an de mal per definir lo fait d’èsser artista occitan, se pòt dire que, per son òbra e sa vida, lo Joan-Luc èra clarament universal e òme d’òc.
 
 
 
 
Alan Roch