Las partidas de XIII son a tornar; las formacions de jove, de Federala e de Nacionala an tornat prene las competicions. Mas, en cap d’aficha de la dimenjada, i aviá de segur lo rescontre amical entre Dragons e Tolosa Olimpic.
 

Superliga: una bona partida de preparacion
 
Lo temps èra al bèl a Brutus per aquel afrontament entre las formacions occitana e catalana que se trapan ara en Superliga.
 
Dins la setmana, lo capitani del TO Jonathan Ford èra partit, coma refusava d’èsser vaccinat. Serà Tòni Gigòt qu’assegurarà lo capitanat, segondat pel pilar Maxime Puèch.
 
Las 3 recrutas australianas dels catalans èran presentas sus la pelena: lo menaire de jòc Mitchell Pearce, lo pilar Dylan Napa e lo polivalent Tyrone May que joguèt al pòst de talonaire. La partida amicala se disputèt sus un bon ritme e qualques placatges quichats mostrèron lo seriós que d’unes metián dins l’afrontament.
 
Los tolosans dobrissián la marca mercé a Lloyd White après una traucada del segonda-linha Domenge Peyroux. Cada alièr dels Dragons, Fouad Yaha e Tom Davies, marcava un ensag. Sam Tomkins transformava lo primièr e los catalans menon 10-6 a la pausa.
 
Dins lo segond temps, pichon a pichon, los Dragons prendràn l’avantatge suls occitans e marcaràn 3 ensages per una sola respòsta dels violets: victòria dels Dracs: 26-10. Tolosa se fa una idèa de çò que l’espèra ongan.
 
Dins una autra partida amicala, Wigan es anat ganhar a Warrington: 14-6. Debuta de las causas seriosas dins una quinzenada: revenge de la finala pels Dragons lo dijòus 10 a Saint Helens e recepcion dels Gigants d’Huddersfield per Tolosa lo dissabte 12.
 
Aquesta dimenjada, las 14 formacions del Championship an entamenada lor competicion.
 
 
Elèit 2: partida siberiana
 
Aqueste dimenge, la temperatura vesinava lo 0°, amb un vent fregeluc en prima, al pè de la Montanha Negra sul terren de Vilagalhenc, ont lo VARL recebiá los provençals d’Entraigas. Los locals se compliquèron la vida fàcia a una formacion jogaira, mas finiguèron que ganhèron: 24-22.
 
 
Elèit 1: retorn a la normala
 
A comptar de la debuta de febrièr, se lo public deurà gardar la masqueta dins los estadis, serà pas pus question de limitacion del nombre d’espectators. Lo servici de comunicacion de Carcassona XIII proclama: “Que la fèsta torne començar!” e anóncia un brave freginat abans los rescontres U19 e Elèit 1 fàcia a Avinhon dimenge que ven a l’estadi Domèc. Dissabte, St Estève-XIII Catalan reçauprà Limós, alara que, dimenge, los rescontres Tolosa-Albi e St Gaudenç-Lesinhan son al programa per aquela primièra jornada de las partidas de retorn.
 
 
 
 
Alan Roch