La premsa italiana a especulat amb una autra causa possibla de l’abdicacion de Beneset XVI. En començant pel jornal influent La Repubblica, los grands jornals italians an descrich amb detalh lo resultat, teoricament secret, del rapòrt sus l’afar nomenat Vatileaks. La conclusion que i serián arribats los tres cardinals, autors del rapòrt, es que dins lo Vatican, operarián de màfias economicas e de tramas sexualas que serián arribadas a sequestrar las decisions de la Glèisa. Lo Vatican a negat aquela version dels faches.

L’article de La Repubblica analisa las intervencions publicas del Papa d’aquestes darrièrs meses e liga sas paraulas mai estonantas a la coneissença del rapòrt que n’encarguèt tres cardinals de mai d’ochanta ans. Los cardinals s’acampèron setmanièrament amb Beneset XVI en li explicant las conclusions. Aquelas conclusions escandalizèron l’evesque de Roma ben talament qu’auriá decidit d’abdicar, perque considerariá que la Glèisa a de besonh, ara, d’un papa jove amb fòrça energia, capable de desmontar aquelas tramas de poder dins lo Vatican.
 
Se tractariá basicament de grops d’interèsses economics qu’emplegarián lo Vatican per lors operacions irregularas, e pereu s’agiría d’una espècia de trama de prelats omosexuals qu’organizariá de favors sexualas dins los Vatican e dins divèrses locals de Roma, que lo rapòrt identifica.
 
Tanben, dijòus passat, la revista Panoramapubliquèt en son edicion de papièr un larg resumit del rapòrt, en disent que lo Papa obligarà lo conclau de n’escotar las conclusions.