Los salariats de la SAM (Societat Avaironesa de Metallurgia) an gaireben totes recebut lor letra de comjat. Pasmens, se vòlon pas resignar. Qualques unes se relèvan dempuèi 70 jorns per ocupar la fabrica, çò rapòrta France 3. Yvon Marre, amb mai de 40 ans d’ancianetat a la SAM, ven cada jorn. “Avèm viscut 40 ans amb de companhs, sèm gaireben una familha. Vivèm ensems, nos remontam lo moral. Volèm qu’aquela fabrica torne prene l’activitat”.
 
 
De dificultats dempuèi mai d’una annada
 
La SAM es una fondariá installada sus las nautors de la Sala, a una quarantena de quilomètres al nòrd-oèst de Rodés. L’usina fabricava de pèças pel sector automobil. E son accionari principal èra Renault.
 
Represa en 2017 pel grop chinés Jinjiang, la SAM foguèt plaçada en redreiçament judiciari lo 10 de decembre de 2019. Lo 26 novembre passat, lo tribunal de comèrci de Tolosa declarèt la cessacion d’activitat e la liquidacion de l’entrepresa, après lo refús del grop Renault de sosténer l’unic projècte de represa.
 
 
L’espèr d’un misteriós repreneire
 
Un espèr es nascut fa qualques jorns, que la presidenta de la region Occitània a indicat aver una pista seriosa per un repreneire, sens ça que la citar un nom. Los sindicalistas ne vòlon saber mai. “Un projècte sembla de se concretizar mas volèm de precisions sul tipe d’activitat e sul nombre de salariats represes. De tot biais, se vei qu’avèm agut rason de protegir lo nòstre aplech de produccion” çò explica David Gistau, lo representant de la CGT.
 
 
Aparam lo nòstre material, si que non o nos van tot prene e tot vendre
 
Mimi Carles, salariada de la SAM dempuèi 34 ans, ela tanben, cada jorn a la fabrica dempuèi la debuta de l’ocupacion. “Sèm totes units, es aquò que nos fa téner. (...) Se viram l’esquina, es acabat, tot es despolhat. Volèm qu’aquela fabrica contunhe de viure. Tant qu’aurem pas res de concret, aital farem.(…) [sèm] coma lo vilatge gallés [d’Astérix e Obélix] que se bat contra las gents d’ailamont qu’o deslocalizan tot. Après, espèri qu’a la fin i aurà un grand repais. Pels singlars, i aurà pas de mal per ne trapar, avèm pro de caçaires”.
 
 
 

Après des mois de lutte et 69 jours d’occupation de l’usine, les salariés de la SAM trouvent une raison d’espérer. Un repreneur se profile pour la fonderie de Viviez, dans l’Aveyron, premier employeur privé du bassin de Decazeville.
Reportage https://t.co/URoR9T6tN9pic.twitter.com/SK6WgZolfi

— Luis Reygada (@luis_reygada) January 31, 2022