Lo Projècte Glass de Google es cada jorn mai près d’arribar als usatgièrs. Après lo presentar en de congrèsses de desvolopaires, e après mostrar un sòci fondador de l’entrepresa amb un prototipe dins lo mètro de Nòva York, ara Google a mostrat, a travèrs d’un nòu vidèo, de qué son capablas las siás lunetas de realitat aumentada. La companhiá mòstra lo comportament de Glass en un viatge en balon, en una pista d’esquí o en una casuda liura en paracasuda, que dempuèi aquelas situacions, se fa de fòtos, de vidèos, de videoconferéncias o se seguís de rotas de Google Maps.
 
Se presentèt aquelas lunetas dins la darrièra conferéncia Google I/O de San Francisco e, ara per ara, la companhiá a començat de n’enviar als desvolopaires per que ne pòscan traire lo profièch maximal. Mercés a la realitat aumentada, los usatgièrs pòdon aver fòrça foncions d’un esmartfòn o d’una tauleta dirèctament als uèlhs.
 
Dempuèi èsser anonciadas a San Francisco, Google aviá mostrat de petits extraches de çò que se pòt veire a travèrs d’aquelas lunetas. Mas de qué son vertadièrament capablas, aquò apareissiá pas en detalh. Dins lo vidèo novèl, se vei qu’en disent solament “fai una fotografia” o “fai un vidèo”, en apondent la formula “OK Glass” abans cada òrdre, las lunetas començan d’executar l’accion. Fotografias, vidèos, videoconferéncias e widgets, amb l’ora, lo jorn o la temperatura ambienta, son qualques unas de las foncions que i apareisson.