França met lo ponch final al trissatge dels poletons mascles a la naissença dins la filièra de las galinas pondeiras. Desenant las bòrdas d’aquela mena deuràn installar de sistèmas d’ovosexatge. Un decret publicat dimenge passat dins lo Journal officiel establís qu’a la fin de 2022 se deu metre lo ponh final a la practica d’eliminar los poletons mascles l’endeman de la sortida de l’uòu. Es una practica abituala dins l’indústria de las galinas pondeiras car aquela raça de volalha a pas pro de carn coma las d’engraissament.
 
L’estat francés es lo primièr productor d’uòus de l’Union Europèa e se calcula que cada an se tua unes 50 milions de poletons mascles.
 
La mesura fa preveire un aument del prètz dels uòus. L’adaptacion als sistèmas d’ovosexatge farà pojar lo prètz de 0,2 a 0,4 èuro per mièja dotzena d’uòus, çò ditz lo representant de l’FNSEA a France Info. Segon aquel sindicat agricòla, qu’es lo mai important de l’estat, las ajudas de l’estat prenon pas en carga totalament lo subrecòst, e se crenh que la mesura “pause un vertadièr problèma de competitivitat”. A mai, ditz que “se los consumaires vòlon pas préne en carga aquel còst e, per tant, crompan d’uòus importats que vengan d’autres païses qu’apliquan pas aquel metòde, aurem pas res ganhat pel benèsser animal”.
 
Ara, demandan una armonizacion de las nòrmas europèas per non patir de concurréncia desleiala.
 
Alemanha es lo primièr país de l’UE a aver enebit aquela practica. Ça que la, dins la rèsta de l’UE es permés que se tue los poletons tanlèu espelits, en los trissant o en los asfixiant amb de gas CO₂. Segon la nòrma de l’UE, cal que lor mòrt siá immediata dins las primièras 72 oras après la naissença. Se calcula que cada an se sacrifica dins l’UE aperaquí 300 milions de poletons.