Aquesta annada per causa de la covid, los parents podián pas venir menar de talhièrs coma las autras annadas. Ongan, son los enfants que se son encargats d’aquela mission. Los grands se podián pas mesclar amb los pichons.
 
Lo dijòus de la darrièra setmana abans las vacanças de Nadal, vint e un talhièrs foguèron prepausats per d’enfants.
 
Per exemple, Sirine, Agathe e Marilys menèron un talhièr per fargar de cartas de Nadal. Nos calguèt de gredas, de papièr e un fèutre negre. Per començar, caliá far un desgradat de las colors que voliam e las estompar. En seguida, caliá dessenhar dessús, per fin finala escriure una formula de “bonas fèstas” abans de poder balhar la carta.
 
D’autres mainatges prepausèron d’origamis, o de bricolatges de Nadal per fargar de saps en broquetas, de bolas en papièrs o encara de decoracions de penjar al sap a l’ostal.
 
Tres còlas de mainatges s’èran tanben engatjats a metre en scèna e jogar tres contes de Bodon tirats del libre Los contes del Drac. I aviá “Lo moton”, “La fada de Viaur” e “L’enfant polit”. Los joguèrem a la mairala, puèi als grands. Lo matin “L’enfant polit” passèt a 10h, puèi “Lo moton” a 10h30 e l’aprèp-miègjorn “La fada de Viaur” a 16h.
 
A miègjorn, aguèrem un fòrça bon repais de Nadal. La cantina èra ondrada, tant coma l’escòla entièra. Mercé a la Nadina e a l’Emilia per aquò!
 
Per far un bon gostar de Nadal, la comuna nos ofriguèt a cadun una boita clafida de bonas causas.
 
Lo tantòst, los talhièrs contunhèron. Passèrem una plan bona jornada!

 
 
 
Elie, Camille, Sirine, Louiza, Paloma, Marilys, Agathe e Mathilde
Calandrons de la Calandreta de Carcassona (CM2)

 
 

Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…