Primièr diplòma d’Estat en lenga occitana per adultes, lo Diplòma de Competéncia en Lenga (DCL) es obèrt a tot public e s’inscriu dins una amira de desvolopament personal o d’inseriment professional. Per passar lo DCL, inscrivètz-vos en linha abans lo 10 de març de 2013

Estudiatz l’occitan en cors setmanièr, estagi intensiu, per correspondéncia o via Internet?
 
Coneissètz ja l’occitan e desiratz far valer vòstra competéncia en tant qu’ensenhaire, formator de cors per adults, personal non ensenhant de las escòlas bilingüas o per tota autra amira professionala?
 
Dins totes aqueles cases, sètz en condicion de passar vòstre diplòma de competéncia en lenga occitana (DCL). L’interés: aquesir una certificacion oficiala segon los critèris del quadre europèu per las lengas. Lo DCL existís per 12 lengas e es accessible sens condicion de nacionalitat, de formacion, o d’activitats professionalas prealablas. Lo DCL certifica la competéncia en lenga de comunicacion dins un usatge social o professional.
 
Per la session 2013, amb lo sosten de la Region Miègjorn-Pirenèus, 80% dels fraisses d’inscripcion son preses en carga per mantunes perfils de candidats del domeni escolar, para-escolar o de la formacion professionala en occitan (véser lo detalh sul document de presentacion). Notatz tanben que lo DCL, coma diplòma estatal professional, pòt balhar dreit a d’ajudas per la preparacion e l’inscripcion. Informatz-vos alprèp de vòstre emplegaire o de vòstre Pòl emplec.
 
L’inscripcion es obligatòria sul site del DCL abans lo 10 de març de 2013. L’examèn se debana lo 22 de mai de 2013 a Tolosa e Milhau, per çò qu'es de l'Académia de Tolosa. Al delà, aquel examèn es tanplan prepausat dins las acadèmias de Bordèu, Montpelhièr e Niça.
 
Mantunes organismes associatius o universitaris prepausan de formacions en lenga occitana. Consultatz lo site Aprenem l’occitan. Lo CFPO e l’IEO, en particular, son partenaris del DCL en Miègjorn-Pirenèus.
 
Per d’autras entresenhas: dcl.occitan(a)ac-toulouse.fr
 
 
 
 
Institut d’Estudis Occitans