Lo nombre de refugiats birmans a doblat dempuèi lo còp d’estat militar en Birmania, e ara son mai d’800 000, çò avertiguèt divendres lo Naut Comissariat de las Nacions Unidas pels Refugiats (NACNUR).
 
Segon lo NACNUR, aperaquí 440 000 personas son estadas desplaçadas dempuèi lo 1r de febrièr de 2021, los quals s'apondon als 370 000 qu'avián fugit lors ostals precedentament. L’organisme internacional prevei que lo nombre de desplaçats aumente considerablament dins las setmanas avenidoiras.
 
Segon lo Naut Comissariat, aquò es la consequéncia de la deterioriacion de la seguretat en aquel país a mesura qu’aumentan los conflictes e los combats.
 
Lo rapòrt que l'a publicat l’organisme internacional explica tanben que l’accès umanitari a certanas regions es totjorn restrench a causa de l’inseguretat, del blocatge d’estradas e de las dificultats per obténer de permissions d’accès.
 
Dempuèi lo còp d’estat militar, s’es tuat mai de 1200 personas e se n’es detengut mai de 10 000, segon l’associacion dels  presonièrs politics de Birmania.  Lo putsch aguèt luòc lo 1r de febrièr de 2021, lo jorn que se deviá constituir lo parlament sortit de las eleccions del 8 novembre de 2020 amb una Aung San Suu Kyi plan refortida. La cap birmana e son partit istoric contra la dictatura aviá clarament ganhadas las eleccions vistas coma un referendum sus la gestion del govèrn de la filha del paire de l’independéncia birmana.


 

We are scaling up our emergency response to assist internally displaced people in Myanmar as their number crossed the 800,000 mark – doubling in the past year – and armed conflict intensifies.https://t.co/ThV9ULrIef — UNHCR, the UN Refugee Agency (@Refugees) February 11, 2022