Una còla de ciutadans de Perpinhan a aviada una peticion sus change.org per que lo cònsol màger de la vila, Louis Aliot, del partit d’extrèma drecha Recampament Nacional, convòque una consultacion populara per restablir l’escais “Perpinhan la Catalana” dins lo blason de la vila.
 
Coma o denóncian, lo cònsol retirèt lo lèma de l’escut de manièra unilaterala sens cap de consulta prèvia dels abitants de la vila. Explican tanben qu’a ensajat de far desaparéisser los panèls en catalan a las intradas de la vila.
 
“Son de petits passes, que sens que nos en mainem, escafan nòstra cultura, nòstra istòria, nòstra identitat e nòstre sentiment prigondament catalan de Perpinhan e de sa region”, çò explican dins un comunicat.
 
“Devèm promòure e protegir nòstra identitat, podèm pas tolerar una assimilacion forçada e la pèrda de la cultura, de la lenga, que constituisson la basa de nòstra riquesa, e fan doncas partida de nòstre patrimòni, que deurem legar a las generacions futuras”.
 
A mai, denóncian tanben qu’Aliot agís sens cap d’oposicion e que l’extrèma drecha se servís de Perpinhan coma un laboratòri per estendre sas politicas dins la rèsta de l’estat francés.



 

---

 https://www.change.org/p/monsieur-le-maire-de-la-ville-de-perpignan-al-batlle-de-perpinyà-référendum-populaire-afin-de-rétablir-le-nom-de-perpinyà-la-catalana