Lo comitat d’organizacion dels Jòcs Olimpics de París a demandat als diferents conselhs departamentals franceses de finançar e d’organizar lo passatge de la flama olimpica sus lor territòri, aquò per un còst de 150 000 èuros minimum. Per de nombroses elegits, lo prètz demandat es fòra de tota mesura.
 
Pr’aquò, lo passatge de la flama olimpica dins los territòris que fan la riquesa de l’estat francés, previst en abril de 2024, o a tot per agradar e lo Comitat d’organizacion dels Jòcs l’a presentat jos un angle mai que positiu: “eveniment emblematic, festiu, convivial”… Tot aquò, totun, sens ne comptar lo còst. Per tant, dins la region qu’a pres lo nom d’Occitània, mai d’un conselh departamental, sollicitats pel comitat per fin d’alestir lo passatge de la flama sus una jornada entièra, son estats trucats per la soma “exorbitanta” a sortir de la borsa: pas mens de 150 000 èuros. D’elegits an doncas tot simplament refusat de metre la man a la pòcha, çò rapòrta France Bleu. Es lo cas, per exemple, del departament d’Òlt: “Los Jòcs Olimpics son una enòrma maquina financièra qu’a pas besonh de las finanças publicas per viure”, çò a fach conéisser lo departament, qu’apond que l’investiment “auriá pas agut cap de consquéncia en matèria economica” pel territòri. Dins la rèsta de la region administrativa, los departament d’Arièja, dels Nauts Pirenèus o encara Tarn e Garona se son pas encara decidits: “La decision es pas encara presa e ne debatrem lèu-lèu”, çò precisa lo president del conselh departamental dels Nauts Pirenèus dins La Dépêche. “Nos demandan totun 180 000 èuros. Francament, es car”. L’elegit afirma “agachar çò que fan los autres departaments”. Sols quatre departaments de la region dicha Occitània se son portats candidats per aculhir la flama a l’ora d’ara: Tarn, la Nauta Garona, Avairon e Aude. “Las valors de l’olimpisme son de valors a las qualas lo conselh departamental es estacat e l’organizacion dels Jòcs Olimpics en 2024 es per nosautres una escasença fòrta de las far partejar largament”, çò respond la presidéncia del conselh departamental d’Aude a La Dépêche, malgrat que se rancure “lo montant elevat” del chèc exigit pel comitat. “Lo moment vengut, ne discutirem lo format”, çò explica la presidéncia del conselh departamental.
 
Dins la rèsta de la region, Òlt e Garona a ja respondut de non, coma lo Naut Léger, Cruesa e la Nauta Vinhana. En Provença, los departaments de Vauclusa e dels Alps de Nauta Provença se son engatjats per l’acuèlh de la flama. La majoritat dels autres demòran encara dins l’esitacion, o desiroses de tornar negociar los tèrmes financièrs del contracte.
 
 
Un minim de 150 000 èuros ... per qué far?
 
Interrogat sus la participacion financièra dels departaments, lo comitat d’organizacion dels Jòcs Olimpics de París 2024 afirma que prendrà a sa carga una “granda majoritat” dels còstes ligats al passatge de la flama. La carga financièra qu’es demandada als departaments permetrà, segon lo comitat, de finançar l’organizacion de l’eveniment, las activitats festivas que seràn tanben programadas a l’entorn del passatge de la flama, e “la comunicacion a l’entorn del relèu”. Segon lo comitat d’organizacion, “una plan granda majoritat de departaments an ja aculhit positivament aquela cambada, e i veson l’oportunitat d’organizar de festivitats e d’obténer de retombadas economicas, de valorizar los engenhs locals, los clubs esportius o las associacions en participant a la causida dels esportius que participaràn, e aquò per una mobilizacion sus plusors meses, plan al delà de la jornada de traversada de la flama”.