Al delà de las informacions esportivas, la novèla importanta de la dimenjada es la dobertura dels estanquets dins los estadis. D’un caire, aquò farà ben a las finanças del club, mas mai que mai, marcarà un pas bèl cap a un retorn a la normala dins lo biais d’anar seguir las partidas en refortissent la convivialitat.

Superliga: Dragons sens pilars
 
Dissabte, los Dragons recebián Wakefield. Se trapan en manca de pilars: Dubson (3 partidas) e Napa (4 partidas) suspenduts, Bosquet nafrat aprèp la partida a St Helens e, dins lo primièr temps, s’i ajustèt Goudemand assucat. Los catalans marquèron tres ensages mas daissèron los angleses replicar: 16-10 a la pausa; marcavan un novèl ensag a la represa, puèi una penalitat que fariá la diferéncia vist que, sus la còrna, Wakefield tornèt a 24-22.
 
Dimenge, Tolosa mesurèt tornar la diferéncia entre Championship e Super League: desfaita a Salford 38-12 abans de reçaupre Warrington (dissabte 26 de febrièr) e Wigan (dissabte 5 de març)!
 
Segonda victòria per Saint Helens (38-6 cò d’Hull FC), Huddersfield (26-12, fàcia a Hull KR), Warrington (34-10 fàcia a Castleford) e Wigan (34-12, fàcia a Leeds).
 
Dijòus, los Dragons jogaràn a Leeds (partida retransmesa per BeInSport).
 
 
Elèit 1: en febrièr, lo canari pèrd las plumas
 
En aqueste mes de febrièr, Carcassona dominèt aisidament Avinhon d’en primièr, puèi perdèt lo dèrbi a Limós, e aqueste dissabte de ser se faguèt susprene per Albi en faguent de presents: d'ensages encaissats aprèp una 40-20, sus una pauma raubada a un contra un a l’arrièr, sus intercepcion, etc. Desfaita dels Canaris 34-16.
 
Dissabte tanben, Avinhon mòstra sa montada en poténcia en dominant Vilanòva: 46-6; Dimenge, a Lesinhan, Tolosa ten còp 50 minutas abans de plegar 50-20 alara que Limós se passeja fàcia a la lantèrna roja Sent Gaudenç 54-0.
 
En Elèit 2, lo primadièr Pià a totjorn pas perdut e va ganhar cò de son segond Illa del Riberal 28-18.
 
La dimenjada qu’arriba en Elèit 1 veirà se debanar las partidas Vilanòva-Albi, Dragonets-Avinhon e los dèrbis St Gaudenç-Tolosa e, en cap d’aficha, Carcassona-Lesinhan.
 
 
E un brave caçolet…
 
Un dinnar d’avantpartida precedirà aqueste dèrbi Carcassona-Lesinhan aqueste dimenge 27 de febrièr a miègjorn jol tibanèl de l’estadi Domèc. Carcassona festejarà los jogaires que realizèron lo doblat campionat-copa de 2021. Los sostens poiràn suportar las emocions de la partida aprèp aver manjat la salada compausada, un caçolet, lo formatge e las doçors, e begut, tanben, de vins audencs e de blanqueta de Limós (per se marcar: contactar lo secretariat de Carcassona 13 carcassonne-xiii@orange...; Tel: +33(0)4 68 77 59 01).
 
 
 
 
Alan Roch