Lo drech d’autodeterminacion e l’oficialitat del Catalan dins l’Union Europèa se tròban demest las proposicions mai votadas de la Conferéncia per l'Avenidor d'Euròpa, que Brussèlas organiza ongan per far venir las institucions europèas mai participativas e mai pròchas dels ciutadans. Segon la Comission Europèa, aquela conferéncia es un “important exercici democratic paneuropèu amb de debats dirigits pels ciutadans que permeton a las personas de tota Euròpa de partejar lors idèas e d'ajudar a configurar un avenidor comun”.
 
Las proposicions mai votadas arribaràn a la plenièra de la conferéncia, ont participaràn de centenats de politicians europèus, e seràn somesas al debat. Serà lo primièr còp qu’un organisme europèu examinarà dirèctament l’autodeterminacion de Catalonha e l’oficialitat del catalan. Dempuèi de decennis aquestes subjèctes se son pas poguts metre al debat de l’UE a causa de las pressions espanhòlas.
 
La proposicion sus l’autodeterminacion reclama un mecanisme clar per que las nacions sens estat pòscan venir independentas dins l’UE. “Euròpa pòt pas èsser una camisa de fòrça incapabla de respondre a las demandas democraticas de sas gents”, çò ditz la proposicion, qu’amb 808 adesions es en tèsta dins la categoria dicha Democracia Europèa.
 
D’autre latz, la proposicion per que lo catalan siá lenga oficiala de l’Union Europèa remembra que lo parlan mai de dètz milions d’europèus. “Los ciutadans catalanòfons de l’Union Europèa an drech de pas èsser tractats coma de ciutadans de segonda classa a causa de lor lenga”, çò ditz la proposicion, qu’amb 697 adesions es en tèsta dins la categoria sonada Valors e Dreches, Estat de Drech e Seguretat.