La Federacion Russa a reconegut l’independéncia a respècte d’Ucraïna de las republicas de Donetzk (RPD) e Luhansk (RPL), que s’autoproclamèron sobeiranas en 2014 après la crisi de Maidan. Lo president rus, Vladimir Putin, a signat los decrets de reconeissença dels dos estats après prononciar un discors ont rebutava la legitimitat istorica d’Ucraïna coma país.
 

Lo president rus a assegurat que “l’Ucraïna modèrna foguèt entièrament creada per Russia, e mai concretament, per la Russia comunista bolshevica”. Putin a afirmat que Lenin foguèt lo responsable de separar de Russia “sos pròpris territòris istorics” d’Ucraïna, a criticat la decision dels ierarcas sovietics de permetre la secession de las republicas constituentas de l’Union Sovietica, e a dich que la dissolucion de la superpoténcia foguèt, en realitat, “l’escrancament de la Russia istorica jol nom de l’URSS”.
 
Après qualificar l’existéncia d’Ucraïna d'“error istorica” dels comunistas, Putin l’a menaçada a prepaus del procès de descomunistizacion (“dekomunizatsia”, en rus) que lo país a entreprés dempuèi la fin de l’Union Sovietica. “Volètz la descomunistizacion?”, çò a demandat Putin dins son discors. “D’acòrdi, va plan. Mas cal pas s’arrestar a mièg camin: sèm prèstes per vos mostrar co que significa per Ucraïna una descomunistizacion reala”.
 
Apuèi, lo dirigent rus a afortit qu’Ucraïna “a pas jamai agut una tradicion establa d’estatalitat” e a acusat “l’oligarquia” ucraïnesa d’aver mes lo país al servici dels interèsses occidentals e de l’aver “corrompuda” fins al ponch que, segon Putin, Ucraïna es pas quitament un país plenament sobeiran, mas una sòrta de colonia o protectorat estrangièr.
 
En mai d’aquò, Putin a assegurat tanben que l’acercament ucraïnés de l’OTAN es una “menaça dirècta contra la seguretat de Russia”, e a dich que lo “regim” que “comanda” en Ucraïna deuriá arrestar las “ostilitats” contra Russia, Donetzk e Luhansk. “Autrament, tota responsabilitat d’una possibla continuacion de l'escampament de sang” serà atribuida al govèrn ucrainés, çò a conclús.
 
 
Desplegament de tropas
 
Après signar las reconeissenças de las republicas de Donetzk e Luhansk e dos tractats d’amistat amb los dos estats —que sos caps, Denis Pushilin e Leonid Pasechnik, se trobavan dins lo Kremlin—, Putin a ordenat que l’armada russa se desplegue dins l’RPD e l’RPL per garentir lo “mantenement de la patz” dins los dos territòris. La linha de front entre las doas republicas e Ucraïna es activa dempuèi 2014. Segon d'estimacions de las Nacions Unidas, dempuèi alavetz son mòrtas mai de 13 000 personas e mai d’un milion son vengudas de desplaçats intèrnes en Ucraïna.
 
Las doas republicas de Donbass son, en practica, dos protectorats russes amb una dependéncia practicament totala de la proteccion militara e del sosten economic e politic de Russia.
 
Ara, çò que rèsta de veire es s’aqueles movements seràn l’anticambra d’operacions guerrièras que lor tòca seriá prene mai de territòri a Ucraïna, d'ocupar lo país o de provocar un cambiament de govèrn, o ben se Putin s’arrestarà aicí e esperarà de veire la reaccion de las cancelariás occidentalas.
 
Lo discors de Putin e la reconeissença de las doas republicas de Donbass son estats refusats per la majoritat de las cancelariás occidentalas e, evidentament, per Ucraïna. Lo ministèri dels afars estrangièrs ucraïnés a dich que la decision russa “viòla la sobeiranetat e l’integritat territoriala” del país, e qu'es una provocacion contra las “nòrmas e los principis fondamentals de la lei internacionala e de la Carta de las Nacions Unidas”. Dins lo meteis comunicat, lo govèrn ucrainés demanda a la comunautat internacionala qu’aplique “de sancions sevèras” contra Russia.
 
 
La fin dels Acòrdis de Minsk
 
La reconeissença de las doas republicas entèrra los Acòrdis de Minsk de 2014 e 2015, pels quals Ucraïna acceptava l’autonomia de Donetzk e Luhansk. Mas l’interpretacion que ne fasián Kyiiv e Moscòu èran plan diferentas: per Ucraïna, los acòrdis prevesián que las doas republicas rebèllas se tornèsson situar jos son contraròtle dirècte e que la sobeiranetat ucraïnesa demorèsse totalament preservada; mas del vejaire de Russia, significavan que l’RPL e l’RPD —e, a travèrs d’elas Russia—aurián votz e vòte dins lo govèrn politic, economic, judiciari e dins las relacions internacionalas d’Ucraïna a travèrs d’una reforma constitucionala, çò que dins la practica auriá congreat la fin de la sobeiranetat del país e sa subordinacion indirècta al Kremlin.
 
Kyiiv a totjorn refusat d’aplicar lo pache del biais que Russia reclamava. Amb la reconeissença de l’independéncia de las doas republicas, los Acòrdis de Minsk son mòrts. E amb eles, tanben s’avalís la possibilitat que Moscòu pòsca exercir aquela influéncia sus Ucraïna per mejan de paches e camins constitucionals.
 
 
 

---

Aquesta nòva es adaptada de Nationalia, amb qui Jornalet ten un acòrdi de cooperacion.