capçalera campanha

Actualitats

InternacionalPolitica

Lo prefècte de Corsega se’n va en retocant lo reglament interior de l’Assemblada

Pascal Lelarge jutja inconstitucional l’article 1r del dich reglament, per l’expression “pòble còrs” e per l’utilizacion de la lenga còrsa dins los debats

| Alta Frequenza

Tèxte legit

Pascal Lelarge a quitat la carga de prefècte de Corsega en retocant lo reglament interior de l’Assemblada de l’illa, adoptat en decembre passat, per i escafar las nocions de lenga e de pòble còrses. Dins l’encastre de l’exercici del contraròtle de legalitat, Lelarge a jutjat inconstitucional l’article 1r del dich reglament, subretot l’expression “pòble còrs”, e l’utilizacion de la lenga còrsa dins los debats. Demanda la revision de l’article dins los melhors relambis, çò rapòrta Corse Net Infos.
 
Per Lelarge, lo vocable “pòble còrs” es “contrari a la nocion de Republica una e indivisibla inscricha a l’article 1r de la Constitucion del 4 d’octòbre de 1958”. A mai, jutja tanben inacceptable l’article que reconeis l’usatge de las lengas francesa e còrsa dins l’emicicle e insistís que segon la lei fondamentala de França “la lenga de la Republica es lo francés” e que “la lenga francesa es la lenga de l’ensenhament, del trabalh, dels escambis e dels servicis publics”.
 
Lelarge, de 65 ans, es a mand de quitar Corsega après mens de 2 ans en foncions durant los quals es vengut conegut per son combat contra lo corsisme. Los partits del govèrn de Corsèga, autonomistas e independentistas, n’avián demandat mai d'un còp la destitucion.
 
 
 
 
 
 


abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Franc Bardòu
3.

Per Lelarge, lo vocable “pòble còrs” es “contrari a la nocion de Republica una e indivisibla inscricha a l’article 1r de la Constitucion del 4 d’octòbre de 1958” Autrament dit, la nocion de "Republica una e indivisibla" es contrària a la a la nocion de "pòble còrs", per amor que la "Republica" dèu èsser tan multipla coma los pòbles qua la fan e que los dèu aparar, sosténer e premòure, a la risca, se que non, de pèrdre la pus mendra traça de republicanisme, per venir une res privida, qu'unes sonque la possedisson e totes los autres se'n tròban possedits. Tant val dire que la nocion de Republica dèu èsser tornada a sa natura vertadièra, en s'afinant e se destriant enfin de tota nocion de nacionalisme (francés comprés, plan segur) e de tota nocion de dominacion. Las respublicas non fan ni non desfan los pòbles : son los pòbles que se fan las republicas.

Una republica que non pòt sofrir un pòble a un nom : empèri colonial.

  • 6
  • 0
Paoli sempre
2.

Se parla força de l'obsession malautièra e paranoïaca de Potin raport a l'Occident que vei coma una menaça mortala. L'obsession de l'Estat francès raport a las lengas dichas regionalas n'es pas mens malautièra e paranoïaca.

  • 20
  • 0
Pitaluga
1.

Èra estat nomenat per aquò : matrassar los pauques passes endavant de l'Amassada Còrsa.
O fa al darrièr moment, coma un petós, e apuèi s'escapa.
Coma lo Conselh Constitucional, sasit sus la lei Molac al darrièr moment per eludir las reaccions..
Coma lo "Que me vengan quèrre" lançat de l'Ostal d'Ameriva Latina transformat en bunker.
Intolerants e coards.
E l'Arlèri en cap que ditz : "Je vous protègerai".
Amb un protector d'aqueste calibre, lo Potin se deu espofinar.

  • 19
  • 0

Escriu un comentari sus aqueste article