A Aiacciu, una quarantena de conselhièrs territorials dels partits corsistas Fà Populu Inseme, Avanzemu e Core in Fronte ocupèron dijòus passat la prefectura de Corsega a Aiacciu pendent cinc oras, çò que provoquèt la suspension de la sesilha plenièra de l’Assemblada de Corsega, ont s’i deviá debatre de questions budgetàrias.
 
De dintre estant, pengèron al balcon de la prefectura un drapèl còrs e doas bandeiròlas que disián en lenga còrsa “pòble drech” e “ara pro!”
 
Mentretant, a l’exterior se debanava un acamp de sosten als ocupants amb la preséncia del president còrs, Gilles Simeoni. Los manifestants portavan de bandeiròlas que disián “colons defòra” e “França defòra”.
 
En de declaracions a Le Monde, lo conselhièr de Fà Populu Inseme Jean Biancucci expliquèt que fasián un acte politic e simbolic, mas que seriá pas lo sol. “Volèm viure coma còrses, coma pòble, amb nòstre patrimòni e nòstra lenga, e degun, ni lo prefècte, ni l’estat nos empacharàn pas de la parlar”, çò diguèt.
 
Recordem que lo prefècte de Corsega Lelarge, a mand de quitar la carga, s’opausèt mai d’un còp a la majoritat territoriala corsista. Abans sa partença, a censurat dins lo reglament de l’Assemblada en Corsega la mençon del pòble còrs e la preséncia de la lenga insulara dins los debats.
 
 

U Cunsigliu esecutivu di Corsica hè venutu à purtà u so sustegnu à l’eletti di i gruppi Fà Populu Inseme, Core in Fronte è Avanzemu ch’anu occupatu oghje a Prifittura di Corsica. Ricusemu l’inghjustizia è u disprezzu di a demucrazia. Ch’ella sia intesa è capita in Parigi. pic.twitter.com/MaXrnhVaIm — Gilles Simeoni (@Gilles_Simeoni) February 24, 2022