L’Union Europèa a promés de fornir d’armas a Ucraïna, per contrar un Putin sens limits qu’a ja brandida la menaça nucleara. Atal, los 27 sòcis de l’UE an pachat de mandar d’armas per una valor de 450 milions d’èuros per que los ucraïneses pòscan afrontar l’invasion russa, çò a declarat lo naut representant de la politica exteriora de l'Union Europèa, Josep Borrell. A mai s'enviarà tanben de carburant e de material sanitari, per una valor de mai de 50 milions d’èuros. Puèi, la presidenta de la Comission Europèa, Ursula von der Leyen, a anonciat lo barrament de l’espaci aerian a tot avion rus, lo durciment de las sancions contra Russia e Bielorussia.
 
Lo roble rus es tombat d’environ un 30% de sa valor. Es un dels primièrs senhals de l'eficacitat de las sancions economicas.
 
 
Ucraïna dins l’Union Europèa
 
D’autre latz, von der Leyen a dich dins una entrevista a Euronews que voldriá qu'Ucraïna poguèsse far partida de l'Union Europèa. Aquela declaracion arriba qualques oras après qu'Eslovaquia a reclamat un mecanisme especial per l'accès rapid d'Ucraïna a l’UE.
 
 
Ajudas als refugiats
 
Per ara, l’UE es a establir un mecanisme que done responsa a l'arribada massissa de ciutadans d'Ucraïna en Polonha, Eslovaquia, Ongria e Romania en fugissent la guèrra. Se prepausa de concedir lo permés de residéncia als refugiats e de lor donar accès a l’educacion, a las ajudas socialas e a l’atencion medicala mentre que s’examina l’asil.