Diluns passat, la polícia polonesa arrestèt lo jornalista basco, Pablo González, mentre que fasiá son trabalh. Assabentava sus la situacion dels refugiats ucraïneses a la frontièra. Son avocat es Gonzalo Boye, lo meteis que defend Carles Puigdemont. Boye assegura qu’es l’intelligéncia espanhòla qu’a acusat lo jornalista d’èsser pròrús per lo far arrestar per las autoritats polonesas.
 
González es collaborador de divèrses mèdias dont lo canal de television espanhòl La Sexta, lo jornal Público e lo quotidian basco Gara. L’acusan “d’accions contra l’interès de l’estat polonés”. Qualques setmanas abans, lo 6 de febrièr, l’avián detengut los servicis d’intelligéncia ucraïneses quand raportava sus la situacion en Donbass, abans l’invasion russa d’Ucraïna. Pendent l’interrogatòri, Pablo González foguèt acusat d’èsser “pròrús”, li reprochèron d’aver trabalhat per Gara e d’aver una carta de crèdit de la banca basca Laboral Kutxa. Foguèt expulsat d’Ucraïna.
 
Segon Público, mentre que González èra detengut, d’agents de l’intelligéncia espanhòla anèron al domicili del jornalista per interrogar sa familha e verificar s’èra vertadièrament partisan de Russia. A mai, los agents l’avertiguèron que l’avián acusat de trabalhar a Gara, en tot assegurar qu’èra “un mèdia prò-ETA e subvencionat per Russia”. A mai, tanben l’acusèron de “passar d’informacion a Russia”.
 
Tanlèu quitar Ucraïna, lo jornalista basco tornèt en Bascoat. Mas quand comencèt l’invasion russa, se gandiguèt a Polonha per trabalhar. Dins la nuèch del 27 al 28 de febrièr, la polícia polonesa l’arrestèt.
 
Lo govèrn basco assegura qu’es interessat per l’afar. Lo grop politic EH Bildu a demandat d’informacion als parlaments espanhòl e europèu, e Esquèrra Unida a demandat al Ministèri dels Afars Estrangièrs espanhòl qu’intervenguèsse. Plusors jornalistas se planhon del comportament de las autoritats espanhòlas.
 
 
Lo secutament de la premsa basca
 
Gara es un quotidian basco, que subreviu malgrat la persecucion. La justícia espanhòla faguèt pagar al quotidian basco tot lo deute que l’ancian jornal Egin aviá amb la Seguretat Sociala espanhòla. Egin foguèt victima de la persecucion politica de l’estat contra l’esquèrra basquista e li reclamavan un deute de tres milions d’èuros. La còla de Gara poguèt pagar aquesta soma arunan gràcias al sosten de milièrs de personas mas cap d’ajuda institucionala.
 
En 1998, la justícia espanhòla tampèt Egin e ne detenguèt qualques responsables. En 2009, la Cort Suprèma espanhòla daissèt sens efièch lo barrament d’Egin, mas lo quotidian poguèt pas èsser editat tornarmai e mai se li reclamèt un deute enòrme amb la Seguretat Sociala. La justícia espanhòla a fach pagar aquel deute al jornal Gara amb un argument un pauc escur: “la succession ideologica d’entrepresa”.
 
Per poder pagar aquel deute e subreviure, la còla de Gara a organizat aquestes ans d’eveniments solidaris e una campanha d’abonaments que li an respondut environ 10 000 ciutadans.
 
Gara (en basco Sèm) es un quotidian en basco e castelhan que ten 120 salariats e fa trabalhar d’autres 200 professionals.