capçalera campanha

Actualitats

InternacionalPoliticaSocietat

Corsega: setmana de protèstas e susmautas

La temptativa d’assassinat contra Yvan Colonna a indignat los partits e los movements còrses

Tèxte legit

Pendent tota la setmana an agut luòc de protèstas e de rambalhs en Corsega, en reaccion a la temptativa d’assassinat contra Yvan Colonna dins la preson d’Arle. Se compta almens 40 personas nafradas, dont 23 policièrs, segon la prefectura del departament de la Nauta Corsega. Los agents recebèron de coctèls molotov e d’artefactes explosius artisanals diches “bombas agricòlas”. De son latz, la prefectura de la Corsega del Sud insistís sul fach que la violéncia contra las fòrças de l’òrdre constituís pas una responsa “al drama qu’afectèt Yvan Colonna e sos pròches”, e a reclamat de calma e tanben lo dialòg.
 
Lo presonièr còrs Yvan Colonna se tròba dins lo còma dins una situacion fòrça grèva dempuèi qu’un autre presonièr l’escanèt dimècres 2 de març. L’agression a provocat l’indignacion de partits e movements còrses, que ne jutjan responsable l’estat francés.
 
Lo govèrn francés ensagèt de respondre a las protèstas en anonciant dimars passat que retirariá la condicion de detengut particularament senhalat a Colonna, çò que li permetriá d’èsser dins una preson de l’illa. Pasmens, los manifestants considèran qu’aquel cambiament d’estatut penitenciari es ara una provocacion, mai que mai quand Colonna se tròba entre la vida e la mòrt e se sap pas dins quinas condicions subreviurà, en cas que subrevisca. 
 
Lo refús de l’estat francés de menar los presonièrs politics dins de centres penitenciaris còrses es un dels “non” mai sistematics que París aja donat al movement nacionalista de Corsega aquestes darrièrs ans. Los partits nacionalistas còrses, qu’an ganhat tres eleccions consecutivas a l’Assemblada de Corsega dempuèi 2015 amb un sosten percentual de mai en mai naut, reclaman un estatut d’autonomia legislatiu, la cooficialitat de la lenga còrsa e la creacion d’un estatut de resident. Lo govèrn francés a pas quitat de rebutar aquelas tres mesuras.
 
Yvan Colonna es un activista còrs condemnat a perpetuitat en 2007 per l’assassinat del prefècte Claude Érignac. Colonna a totjorn afirmat son innocéncia, e lo corsisme considerava que i aviá de motivacions politicas dins son procès.
 
 
 
 
 
 
 


abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

AIO
1.

E viva u populu corsu !

  • 11
  • 2

Escriu un comentari sus aqueste article