L’estonament: Michelle Obama liurèt lo guierdon del melhor filme. Life of Pi (La Vida de Pi) es estat lo filme mai premiat amb quatre Oscars. Lincoln a solament atengut dos prèmis sus dotze nominacions. Haneke capitèt l’Oscar del melhor filme de lenga non anglesa.

Argo, lo filme dirigit per Ben Affleck e basat sus la crisi dels ostatges d’Iran de 1979, es estat premiat amb l’Oscar del melhor filme dins l’ochanta setena edicion dels prèmis de cinèma de l’acadèmia estatsunidenca, debanats dins la matinada de ièr diluns a Los Angeles. Dins un dels estonaments mai grands de la nuèch, la primièra dòna estatsunidenca, Michelle Obama, foguèt encargada de presentar, a travèrs d’un vidèo, los nomenats a aquela categoria.
 
Los prèmis d’ongan, a la diferéncia d’autres ans, an pas agut un ganhant clar. De fach, Argo, al delà del prèmi del melhor filme, a sonque capitat dos prèmis mendres: lo melhor scenari adaptat e lo montatge.
 
Life of Pi (La Vida de Pi) es estat lo filme amb mai d’Oscars: n’a capitat quatre. L’Oscar pel melhor director es anat a Ang Lee. Les misérables a atengut tres Oscars, comprés lo de melhora actritz segondària per Anne Hathaway. Django Unchained (Django desencadenat) n’a obtengut dos: melhor actor segondari (Cristoph Waltz) e melhor scenari (Quentin Tarantino). Lincoln èra lo filme qu’aviá mai de nominacions, dotze, mas a atengut solament dos prèmis: per Daniel Day-Lewis, coma melhor actor protagonista, e la melhora direccion artistica. Lo prèmi per la melhora actritz protagonista es estat per Jennifer Lawrence pel filme Silver Linings Playbook (Happiness Therapy). Amour, de Michael Haneke, a ganhat l’Oscar del melhor filme de lenga non anglesa.
 
 
Vaicí totes los premiats:
 
– Melhor filme: Argo
– Melhor director: Ang Lee (Life of Pi)
– Melhor actor: Daniel Day-Lewis (Lincoln)
– Melhora actritz: Jennifer Lawrence (Silver Linings Playbook)
– Melhor scenari original: Django Unchained
– Melhor scenari adaptat: Argo
– Melhor filme d’animacion: Brave
– Melhora actritz segondària: Anne Hathaway (Les Misérables)
– Melhor actor segondari: Christoph Waltz (Django Unchained)
– Melhora cançon originala: Skyfall
– Melhors efièches especials: Life of Pi amb Bill Westenhofer, Guillaume Rocheron, Erik-Jan De Boer e Donald R. Elliot
– Melhor cortmetratge: Curfew
– Melhora edicion del son: Skyfall amb Per Hallberg e Karen Baker Landers; Zero Dark Night amb Paul N.J. Ottosson
– Melhor dessenh de vestits: Anna Karenina amb Jacqueline Durran
– Melhora fotografia: Life of Pi amb Claudio Miranda
– Melhor documentari: Searching for Sugar Man
– Melhor documentari cort: Inocente
– Melhor montatge: Argo
– Melhor filme de lenga non anglesa: Amour, Àustria
– Melhor maquilhatge e cofadura: Les Misérables amb Lisa Westcott e Julie Dartnell
– Melhora benda sonòra originala: Life of Pi amb Michael Danna
– Melhor son: Les Misérables amb Andy Nelson, Mark Paterson e Simon Hayes