Lo jornal d’investigacion Disclose a revelat que las administracions francesas dels presidents François Hollande e Emmanuel Macron vendèron d’esquipament de guèrra a l’armada russa entre los ans 2015 e 2020. Al total produguèron 76 licéncias d’exportacion per un montant d’operacions de mai 152 milions d’èuros. Qualques contractes existissián dempuèi 2007. Cada entrepresa a besonh d’una licéncia autrejada per la CIEEMG, un conselh compausat del Ministèri dels Afars Estrangièrs, del de la Defensa e de representants del Ministèri de l’Economia.
 
Per se’n recordar, dempuèi 2015 lo Ministèri dels Afars Estrangièrs foguèron jos la man de Laurent Fabius, Jean-Marc Ayrault e ara Jean-Yves Le Drian. Sabèm pas s’an la ròsa dins lo ponh, mas es segur que coneisson la Catherine, una camèra termica fabricada per Thales que permet d’afustar una buta de fòrça quilomètres estant. Aquelas camèras infrarojas foguèron ja emplegadas per dobrir lo fuòc en Ucraïna en 2014, segon un vidèo de l’epòca filmat a l’interior d’un tanc rus T-72.
 

 
Las vendas d’armas an portat de beneficis enòrmes, a ne jutjar per la quòta de las accions de Thales e de Safran, qu’an fòrça progressat al CAC 40:
 

	Març de 2015	Març de 2022
Thales group	52 èuros	111 èuros
Safran	65 èuros	105 èuros

 
Las administracions d’Hollande e de Macron profechèron d’una pichona brèca dins l’embargament europèu: es pas retroactiu. Per èsser clar, las liurasons ligadas a de contractes signats abans l’embargament d’armas pòdon èsser mantengudas. O a confirmat a Disclose la Comission Europèa, en recordant pasmens qu'aquelas exportacions son supausadas respectar “la posicion comuna de 2008”. Aquesta estipula que los estats membres degan refusar las exportacions d'armament se pòdon provocar o perlongar un conflicte armat. Un risc plan present en Ucraïna.
 
 
 
 
Gaël Breysse