L’ÒNU torna avertir sus la situacion umanitària en Iemèn. Lo secretari general adjonch pels afars umanitaris, Martin Griffiths, reclama 4,3 miliards de dolars d’ajuda umanitària per 17,2 milions de personas dins aquel país, lo pus paure de la peninsula d’Arabia, e secutat per la guèrra dempuèi març de 2015.
 
S’en decembre passat l’ÒNU denonciava “la pièger situacion dempuèi d’annadas”, l’invasion russa d’Ucraïna a fach venir la situacion encara pus grèva pr’amor qu’un tèrç del blat del país arriba de Russia e d’Ucraïna e perque los prèses del manjar an doblat. Segon Griffiths, la guèrra en Ucraïna a fach montar lo prètz de las matèrias primièras fins al ponch que 23 milions de personas son en perilh de morir de la fam o de malautiás.
 
Segon lo representant l’ÒNU, la situacion en Iemèn “es entre las piègers del Mond”, 161 000 iemenitas son ja ongan en una situacion d'inseguretat alimentària catastrofica pels quals l’assisténcia umanitària es urgenta .
 

After more than seven years of war, Yemen is a chronic emergency. As aid workers know, there are grave risks in chronic emergencies, namely inertia and fatigue. We have to avoid giving into those forces. 1/5 https://t.co/0tLd3EICIk — Martin Griffiths (@UNReliefChief) March 15, 2022

Las societats e las bancas que ne tiran profièch
 
Delà la permissivitat dels estats, son las grandas societats qu’aprofièchan aquela guèrra. Un rapòrt publicat en abril passat pel Centre Delàs senhala 80 entrepresas, dont Airbus, BAE Systems, Boeing, China Aerospace Science and Technology Corporation, General Dynamics, Leonardo, LIG Nex1, Lockheed Martin, Navantia, Norinco, Raytheon Technologies, Rheinmetall AG, Rolls-Royce, Textron e Thales Group.
 
A mai, lo rapòrt determina tanben quinas bancas an finançat aquelas societats en tirant de beneficis d'aquela guèrra. Las bancas estatsunidencas son, sens cap de dobte, las qu’an aduch mai de cabals, seguidas de las bancas del Reialme Unit, de França, Canadà e Espanha.
 
Aital, las bancas francesas que finançan e aprofièchan aquel desastre umanitari son, per òrdre de beneficis obtenguts, Crédit Agricole, Société Générale, BPCE Group, BNP Paribas e AXA. Quant a las bancas espanhòlas, avèm Banco Bilbao Vizcaya Argentaria (BBVA), la banca Santander e la Societat Estatala de Participacions Industrialas (SEPI)
 
 
Sèt ans en guèrra
 
Dempuèi març de 2015, las armadas d’un desenat de païses, dirigits per l’Arabia Saudita, atacan la milícia shiita dels huthis en Iemèn. Aquesta milícia, tanben coneguda coma Ansar Allah (los Partisans de Dieu) a lo supòrt d’Iran. Participan als bombardaments cinc païses del Conselh de Cooperacion del Golf ansin coma Egipte, Marròc, Jordania, Sodan e Paquistan. De lor costat, los Estats Units autorizèron un sosten logistic als atacs saudianas contra los huthis.