Actualitats
La Cort Internacionala de Justícia a ordenat a Russia d’arrestar la guèrra. Que significa aquela decision?
Tèxte legit
La Cort Internacionala de Justícia (CIJ), la mai nauta jurisdiccion de las Nacions Unidas, a ordenat a Russia de “suspendre sul pic” sas operacions militaras en Ucraïna. Que significa la decision e que se passarà puèi?
Sabiam ja que l’invasion russa èra illegala en drech internacional. Mas la decision de la CIJ fa venir practicament impossible que degun, Russia compresa, pòsca rebutar aquela illegalitat. Es tanben impressionanta l’estrategia creativa d’Ucraïna per obténer que la CIJ entenda l’afar, sus la basa de la convencion suls genocidis de 1948.
|
Los arguments juridics de Russia sus la guèrra
Lo president rus, Vladimir Putin, a donat divèrsas justificacions per envasir Ucraïna. Qualques unas avián pauc a veire amb la lei, coma sas denóncias contra l’OTAN. Mas n’i a doas que se fondan sus d’arguments juridics.
D’en primièr, a afirmat que Russia agissiá per “legitima defensa”. La legitima defensa es una rason establida d’utilizar la fòrça militara en drech internacional. Mas Putin a suggerit que Russia defendiá las doas regions separatistas de l’èst d’Ucraïna que reconeis coma d’estats sobeirans: Donetzk e Lohansk. Legalament, s’agís totjorn de parts del territòri pròpri d’Ucraïna, e non pas d’estats independents, çò que rend absurde aquel argument.
D’en segond, Putin a afirmat qu’Ucraïna cometiá un genocidi contra los russes de soca (ont lo mot genocidi designa cèrts actes comeses amb “l’intencion de destruire” un grop etnic o un autre grop definit). Aquò es, factualament e juridicament, tan fragil coma l’argument de la legitima defensa.
Se los dos arguments son febles, per qué Ucraïna s’es centrada sul genocidi dins l’afar davant la CIJ? Per o comprene, cal examinar la competéncia del tribunal, es a dire son autoritat per decidir sus qualques questions juridicas mas pas sus d’autras.
La competéncia de la CIJ
La CIJ entend solament las disputas entre estats sobeirans (contràriament a la Cort Penala Internacionala, que jutja d’individús per aver comés de causas coma de crimes de guèrra).
La CIJ a pas automaticament de competéncia sus cada estat e cada afar. Cap de govèrn mondial li poiriá pas donar aquel poder. Coma dins nombroses autres aspèctes del drech internacional, sa competéncia se pausa sus l’acòrdi dels estats, dirèctament o indirèctament.
Cèrts estats an donat lor consentiment en fasent de declaracions generalas. D’autres estats an consentit a de tractats particulars que donan a la CIJ lo poder de jutjar las disputas restacadas especificament a aqueles tractats.
Pr’amor que Russia a pas fach cap de declaracion generala, Ucraïna podiá pas demandar a la CIJ que se prononcièsse sus son argument de legitima defensa. Mas Russia a aderit a un tractat pertinent: la convencion sul genocidi.
L’estrategia creativa d’Ucraïna es estada de presentar l’afar a la CIJ en argumentant que Russia fasiá una denóncia falsa de genocidi per justificar son invasion illegala.
L’òrdre fach per la CIJ
Russia se presentèt pas al tribunal de l’Aia per l’audiéncia iniciala al començament març (mas si que mandèt a la CIJ una letra ont expausava son vejaire).
Es un cambiament de comportament. Après que Russia aguèt envasit Georgia en 2008, Georgia tanben faguèt sa denóncia davant la CIJ e ensagèt d’utilizar un tractat diferent per que la cort jutgèsse l’afar. Russia i participèt e de fach emportèt un succès significatiu.
Son abséncia aqueste còp senhala son desengatjament de las institucions internacionalas.
|
Suls 15 jutges, gaireben totes an acceptat d’ordenar a Russia de “suspendre sul pic” sas operacions militaras. I aviá dos dissidents: los jutges de ciutadanatges rus e chinés.
S’agissiá de çò que li dison una ordenança de “mesuras provisòrias” — una decision d’urgéncia dicha abans que lo tribunal entenda tot l’afar. Las mesuras provisòrias son constrenhentas. Aquò es important. Vòl dire que, e mai Russia sostenga a tòrt que l’invasion es legala, ela manca de tot en tot lo drech internacional e obsèrva pas l’òrdre del CIJ.
Pasmens, una decision constrenhenta es pas la meteissa causa qu’una decision executòria. Tant que i a pas un govèrn mondial per donar mai de poder a la CIJ, i a pas de polícia mondiala per far aplicar sas decisions.
Per exemple, en 1999, la CIJ ordenèt als Estats Units de retardar l’execucion d’un alemand condemnat a la pena capitala . Malgrat que lo tribunal confirmèsse qu’una tala mesura provisòria èra constrenhenta, poguèt pas empedir l’execucion.
Mas las decisions de la CIJ pòdon jogar un ròtle mai subtil: en faiçonant lo raconte dels estats respectuoses de las leis e dins las Nacions Unidas.
Aquela decision poiriá encoratjar d’autres estats, quitament los mai reticents, a jónher las sancions contra l’economia russa e mandar d’armas en Ucraïna.
E ara, que se passarà?
Fins a la situacion presenta, la CIJ a sonque ordenat de mesuras provisòrias. A pas quitament conclús qu’aja jurisdiccion dins l’afar. Pòt passar fòrça temps abans que jutge tot l’afar dins son ensemble.
Mas a fach entendre qu’èra receptiva als arguments d’Ucraïna. A remarcat que “i a pas de pròvas” per sosténer l’allegacion de Russia segon la quala Ucraïna a comés un genocidi.
Una autra fòrça de la tèsi d’Ucraïna es que i a pas cap de nòrma de drech internacional que done automaticament a un estat lo drech de n’envasir un autre per empachar un genocidi. Una de las rasons es qu’un agressor cinic poiriá manipular o abusar d’una tala nòrma. Es essencialament aquò la basa d’aqueste afar.
Rowan Nicholson
Professor de Drech, Universitat de Flinders (Austràlia)
Article publicat originàriament en anglés a The Conversation.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Que significa aquela decision ? Far plan rire lo Potin. Lo curat de mon vilatge a tanben ordenat a Russia d'arrestar la guèrra....
La cort de justicia internacionala es pus rapida a condemnar Russia que l'a estatd per condemnar França quand bombardava la Libia o quand los USA envaissian l'Irak e l'Afganistan. Obeit totjorn au financier e farmaceutic.
Si sabetz pas per qui votar, votar contre lo patron, e lo patron quò es lo cartel financier farmaceutic internacionau.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari