Aqueste dissabte 19 de març demorarà una data bèla dins l’istòria del XIII occitan. Lo Tolosa Olimpic recebiá lo campion Saint Helens. S’ausissiá los romegaires professionals: “Que son anats faire dins aquela galèra? Se van prene una brandida! Ne ganharàn pas una de l’annada!…” (e ne passi). Mas, que volètz? Impossible es pas occitan!
 

Los angleses mancan la recepcion del còp de pè d’entamenada e Tolosa marca. Los angleses marcan dos còps sens transformar. Tolosa torna marcar, mas Saint Helens pren l’avantage abans la pausa: 14-12.
 
A la represa, los tolosans van marcar, mas es la contrataca dels Sants que s’acaba darrièr la linha per menar 20-12. Los Blau e Blanc pèrdon pas coratge, se multiplican en defensa; Lucàs Albèrt adreiça una passa decisiva a Hankinson que marca: lo TO torna a 18-20. Demòra 2 minutas de jòc; lo capitani Gigòt capita la passa sautada a Paul Marcon que punta l’ensag: 22-20 pels occitans. Demòra a Pelissièr (que plaquèt mai de 60 còps a Wakefield) de blocar e butar en tòca l’alièr anglés per que Tolosa confirme aquesta primièra victòria istorica sul campion que coneis sus la pelena d’Ernèst Wallon sa primièra desfaita de la sason. Per Tolosa, demòra de confirmar long de la sason per se poder installar tranquillament dins lo mitan del tablèu.
 
Mens estrambordanta foguèt la partida dels Dragons fàcia a Hull KR divendres de ser a Brutus. Los Robins capitèron d’enrambolhar lo jòc, amb un art segur per frenar la realizacion dels tenguts, de montar al limit del fòrajòc e los còps de pè bèls de lor menaire de jòc Jordan Abdull . Se reconeguèt pas l’esquipa catalana de la setmana precedenta fàcia a Wigan. Aprèp una bona debuta de partida, los Dragons s’atudèron un pauc: 10-10 a la pausa. Calguèt un còp de pè de Pearce sus la basa dels pals représ per Chan per faire la diferéncia confirmada per una penalitat de Sam Tomkins encapada dels 45 mètres per una victòria 18-10 plan longa a se dessenhar.
 
 
Dijòus, Wigan aviá batut Castleford 32-22. Divendres, Salford fa plegar Leeds: 26-12. Dissabte, Wakefield va susprene e batre Warrington: 38-22. Dimenge, Hull FC dispausa d’Huddersfield: 14-6.
 
 
Plaça a la Cup
 
Las esquipas de Superliga dintran dins la competicion de la Cup al nivèl dels 8ns de finala. Lo Tolosa Olimpic a decidit de pas prene part a la competicion.
 
Los Dragons Catalans reçaupràn los caps de fila del Championsghip Featherstone dissabte 26 de vèspre (15h30). L’RFL lor i demanda de pagar los còstes de desplaçament dels vesitaires e dels arbitres. Aquò se ditz: relacions cordialas!
 
Autras partidas entre Superliga e Championship: Sheffield reçauprà Hull FC, e Barrow los Gigants d’Huddersfield. Hull KR rescontrarà Leigh. Los tenents St Helens se desplaçaràn a Whitehaven.
 
Tres partidas veiràn d’afrontaments entre formacions del naut nivèl: Warrington-Wakefield; Wigan-Salford; Leeds-Castleford.
 
 
NRL: primièr punt en aur
 
Dijòus, Melbourne menèt 14-0 fàcia als Lapinons, mas se fasián ragantar dins las darrièras minutas per un tombat a 2 punts (al delà dels 40 mètres) de Latrell Mitchell). Ne calguèt passar pel punt en aur. Sus tombat, es l’arrièr Papenhuyzen que balhèt la victòria a Melbourne 15-14. Largas victòrias dels Polets (fàcia a Manly: 26-12), dels Vaquièrs (fàcia a Canberra: 26-6) e de Newcastle (26-4 fàcia als Tigres). Partidas mai sarradas per las victòrias del campion Penrith (20-16 fàcia a Sant Jòrdi), los Titans(20-18 fàcia als neozelandeses), Brisbane (16-10, cò dels Dògols).
 
Amb lo sosten del primièr ministre australian, Scott Morrison, vestit de las colors del club, las Làmias se desfàn de las Anguialas 18-16.
 
Divendres, serà lo temps del dèrbi grandaràs de Sydney entre Polets e Lapinons.
 
 
Elèit 1: lo campion torna trabucar
 
Dissabte, lo campion Lesinhan se desplaçava a Sant Estève per rescontrar los Dragonets. Los Molinièrs entamenèron plan la partida, mas lor indisciplina permetèt als catalans mai dinamics de véncer 32-16. Del temps, Vilanòva ganhava fàcia a Tolosa: 35-22.
 
Dimenge, Carcassona batiá aisidament St Gaudenç (42-10). Limós accelerava dins lo segond temps per batre Albi: 34-14.
 
Aqueste diluns 21, quaranta jogaires se recampan a Perpinhan dins un estagi de preparacion de l’esquipa de França per la Copa del Mond de la tardor .
 
La federacion a publicat las datas de las fasas finalas del campionat d’Elèit 1: barratges lo 30 d’abril e 1r de mai; mièjas finalas, los 7 e 8 de mai; finala, lo dimenge 22 de mai a Narbona.
 
Pel compte de la 15a jornada, dissabte, Carcassona reçauprà Vilanòva. Dimenge, dèrbi al Molin entre Lesinhan e Limós. Se jogaràn tanben aquesta dimenjada: Tolosa-Dragonets e Avinhon-St Gaudenç.
 
 
Coma ieu…
 
Titolèri ma cronica tretzista de la setmana passada “Cantem sota la pluja a Brutus”. E suspresa, un subjècte suls Dragons presentat dins la setmana sus BeInSport aviá per títol: “Chantons sous la pluie à Brutus”! Qui sap?, benlèu me pòdi faire engatjar per la cadena esportiva per dire encara mai fòrt que lo Loís Bonnery e lo Rodòlfe Pirès: “Lo XIII, aquò òc!”
 
 
 
 
Alan Roch