Es mòrt Yvan Colonna. Lo presonièr politic còrs se trobava dins lo còma dempuèi lo 2 de març passat après patir una agression brutala dins la preson d’Arle. Colonna foguèt condemnat a perpetuitat en 2007 per l’assassinat del prefècte Claude Érignac. Mas el afirmava totjorn son innocéncia e lo nacionalisme còrs considerava que i aviá de motivacions politicas dins son procès.
 
L’actual president còrs, Gilles Simeoni, foguèt, justament, l’avocat que defendèt Colonna. Simeoni diguèt dins una entrevista a France Info que “los detenguts còrses èran estats designats coma de butas per de rets islamistas radicals” e qu’el meteis n’aviá avertit dempuèi 2016 totes los “primièrs ministres e interlocutors governamentals”.
 
L’assassin de Colonna se nomena Franck Elong Abé, es un presonièr de 36 ans amb un espés passat delictiu. Complissiá ara sa condemnacion a Arle après èsser detengut en Afganistan. Segon Libération, l’agressor auriá escanat Colonna après que lo presonièr còrs auriá proferit una “blasfèmia”.
 
Aquela agression a causadas de manifestacions de massa en Corsega, de susmautas e divèrsas manifestacions d’indignacion. Aqueles faches an unit lo sobeiranisme còrs, istoricament devesit, que ten un larg sosten popular, e aquò a obligadas las autoritats francesas d’ensajar de mestrejar la situacion; aquestas an quitament parlat d’autonomia, çò qu’avián totjorn rebutat categoricament.
 
Cal prene en compte qu’Yvan Colonna èra un simbòl del sobeiranisme còrs, pr’amor qu’aviá totjorn revendicada son innocéncia, pr’amor que i aviá d’ombras dins son procès e pr’amor qu’aviá viscut quatre ans amagat dins las montanhas de l’illa.
 
De fach, Le Canard Enchainé assegurava que Macron e lo sobeiranisme còrs negociavan, abans la temptativa d’assassinat, lo desplaçament dels presonièrs politics en Corsega e una autonomia per l’illa, mas que de sectors mai centralistas aurián provocat l’agression de Colonna per que la negociacion capitèsse mal.