Manuel Valls rebuta l’existéncia del pòble còrs. O diguèt net e clar dimars passat dins una entrevista a BFMTV: “I pòt pas aver de pòble còrs, i a  sonque un sol pòble, lo pòble francés”. Dins aquel sens, l’èx-primièr ministre francés e èx-conselhièr municipal de Barcelona soslinhèt que l’unitat de França “es pas negociabla”. Per Valls, “téner compte de l’insularitat e  del particularisme còrs, protegir una lenga e una cultura, aquò es fach, l’Universitat de Corti se creèt tanben per aquò fa longtemps, mas i a de linhas rojas”.
 
Tanben rebutèt la revendicacion de l’estatut de resident, una revendicacion del corsisme qu’empediriá de crompar un ostal abans cinc ans de vida dins l’illa. Aquí diguèt que i a pas doas categorias de franceses, mas que totes los franceses son egals.
 
Per quant a la lenga, Valls diguèt que i podiá pas “aver una cooficialitat de lengas, çò es metre al meteis nivèl lo còrs e lo francés” pr’amor que “i a sonque una lenga dins la Republica, es lo francés”.
 
Pertocant lo movement independentista còrs, Valls afortiguèt qu’una part d’aqueste èra violenta e que l’autra menaçava de tornar a la violéncia.
 
Aquelas declaracions, Manuel Valls las faguèt un jorn après la mòrt d’Yvan Colonna, que son agression mortala dins la preson d’Arle a causat de manifestacions de massa en Corsega e a unit lo sobeiranisme còrs dins de mobilizacions istoricas.
 
Après èsser primièr ministre de França, Valls faguèt de politica en Catalonha ont venguèt conselhièr municipal a Barcelona e se faguèt remarcar per son combat, de còps encanhat, contra l’independentisme catalan.
 
 
 

Manuel Valls: "Il ne peut pas y avoir de peuple corse, il n'y a qu'un seul peuple, le peuple français" pic.twitter.com/lMFG8xIyWg

— BFMTV (@BFMTV) March 22, 2022