Deu diluns 7 au divendres 11 de març, 30 liceans de l’Isla de Baish e 19 de Tolosa St Sarnin qu’angón au Principat de Catalonha entà rescontrar e descobrir. Aqueste viatge estoc organizat per Nicolau Rei Bèthvéder e Florant Mercadièr damb l’idèa tanben de tornar lançar l’ensenhament de l’occitan après las atacas de Blanquer contra las lengas regionalas en licèu. Fòrça escolans avèvan en comun l’estudi de l’especialitat occitan creada en 2019.
 
Aqueste escambi, que remonta a 2000, permet aus nòstes joens de véser los ligams pregonds qu’existishen entre aquestas duas lengas sòrs. Bastir Euròpa comença per comprénguer que los nòstes vesins nos semblan.
 
Èra tanben lo parat de vesitar la polida vila de Girona. Los escolans vejón tanben Cadaqués, Olòt, Besalú, los volcans de Garrotxa e Figueres e lo son musèu Dalí. Ua jornada, la deu 10 de març, estoc consacrada a Barcelona on admirèn lo Palais de la Musica Catalana e lo Musèu Arqueologic de Catalonha gràcias a la complicitat de l’aranés Jusèp Boya.
 
Tanben podón constatar las diferéncias e las semblanças de la situacion lingüistica catalana damb la nòsta: lo catalan se compreng facilament e, pr’amor que lo catalan es oficiau, la preséncia de la lenga cosina es plan mès fòrta que la nòsta.
 
La jornada deu 9 de març estoc la deu rescontre damb los liceans Narcís Xifra de Girona. Estoc lo parat de constatar las similituds entre los parlars e començar a escambiar realament. Los liceans presentèn la faiçon d’ensenhar l’occitan, e los de Girona lo catalan. Sustot qu’aquesta vila a gardat lo catalana coma lenga usuala. Amassas, après ua chocolatada e un partida de fotbòl, visitèn lo musèu deu cinèma de Girona. Aquesta jornada de las ricas en escambis estoc possibla gràcias a la collaboracion de Marta Pasqual i Llorenç.
 
Lo succès estoc tau que parlam de hèr ara un escambi mèi important en 2023 pr’amor que los liceans serén recebuts en País Tolosan e après los occitans anguerén dins las familhas gironinas. Tot aquò se haré dins l’encastre d’un programa Erasmus+.
 
Escambi esmavent, ça que la, pr’amor qu’èra lo prumèr arron duas annadas d’embarrament divudas a la covid-19. Véser gojatas e gojats ríser, dançar e parlar amassas qu’èra dejà un grana escaijuda.
 
 
 
 
Nicolau Rei-Bèthvéder
 
 
 
 

 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…