Cada dissabte, e gràcias a Clamenç Pech, presentarem dins Jornalet un personatge istoric del país nòstre, extrach de la cronica de Ràdio Occitània “L’occitan del jorn”, que se difusa de diluns a divendres dins l’encastre de l’emission “L’ora del tè” entre 17h e 18h.

Dins lo rugbi d’autres còps, èra rar qu’un pilar se destaquèsse e ganhèsse sas letras de noblesa. Trotinejava d’un costat e de l’autre del terren. Dintrava en fòrça en mesclada dobèrta o barrada. Per resumir, d’aquel temps, un pilar se contentava de baissar lo cap. E puèi venguèron las setzenas de finala del campionat de 1975-1976 qu’opausèron lo Castras Olimpic a l’FC Lorda. L’entraïnaire de Lorda, André Abadie, experimenta una novèla primièra linha. Lo pack castrés es alara redobtable, especialament lo Gérard Cholley qu’aviá per costuma de se trissar lo vis-a-vis. Foguèt lo cas per las primièras doas mesclanhas del match… mas per totas las autras, los tarneses finiguèron lo cuol sul pelenc. Cal dire qu’aquel jorn, lo vis-a-vis de Gérard Cholley se disiá Jean-Pierre Garuet.
 
Jean-Pierre Garuet-Lempirou, dit “La Garuche” o encara “lo Professor”, nasquèt en 1953 a Pontac, comuna “frontalièra” entre Bearn e Bigòrra. Comencèt sa carrièra rugbistica en tresena linha, “lo mai polit pòst del Mond” segon el. Es al moment del servici militar, al Mont, e de sa licéncia militara a l’Estadi Montés que passa en primièra linha. Un pòst essencial que compara a un pilar de catedrala: “Se s’engruna, es tot l’edifici que s’engruna”, çò diguèt. Contràriament als jogaires d’uèi, que passan sovent d’un club a l’autre d’una sason a l’autra (quand es pas en cors de sason), Garuche demorarà fisèl a l’FC Lorda e i farà l’ensemble de sa carrièra que s’arrestèt en 1991.
 
Foguèt remarcat pro d’ora pel seleccionaire Jacques Fouroux que, suls conselhs de Jean Liénard, alara entraïnaire de l’FC Grenòble, non solament li farà portar lo camiset blau mas encara lo titularizarà. Pendent lo Torneg de las Cinc Nacions de 1984, en seguida d’una garrolha entre davants franceses e irlandeses, l’arbitre fòrabandiguèt lo pilar de Lorda que dintrava dins l’istòria coma primièr jogaire francés a èsser expulsat al cors d’un rescontre oficial. Après una suspension de tres meses, tornarà a l’encòp en fòrça e en gràcia… a tal punt que los angleses li diràn “melhor pilar del Mond” après lo grand slam de 1987. Garuche totalizarà 42 seleccions entre 1983 e 1990.
 
Après aver racrocat los crampons, contunhèt de s’investir pel rugbi en sesent al comitat departamental dels Nauts Pirenèus, puèi del comitat regional. Serà tanben seleccionaire del XV de França a la debuta dels ans 1990. Fisèl a sa vila e a son club, serà vicepresident de l’FCL e adjunt a la comuna duscas en 2014. E mai se soslevèsse pas lo bloquièr de Brennus amb sos coesquipièrs, e mai las melhoras annadas de l’FC Lorda foguèsson ja darrièr el… La legenda de Garuche demòra.
 
 
 
 
Clamenç Pech