Es partida l’edicion d’ongan de la Korrika, la corsa per la lenga basca qu’entre lo 31 de març e lo 10 d’abril travèrsa lo Bascoat jol lèma de “portar lo basco dels mots a l’accion”. Delà lo Bascoat, uèi dissabte 2 d’abril se ten tanben dins mai d’una cinquantena de vilas del Mond entièr dont Tòquio, Chicago, Montréal... e mai Alacant, Palma, Valéncia e Barcelona. Un còp, la Korrika arribèt tanplan a Tolosa.
 
 
Enebida dins un quartièr de Madrid
 
A Madrid, totun, ont se debana regularament dempuèi 2007, un dels quartièrs principals per ont deviá passar l’a enebida. Lo conselh del districte de Chamberí n’a rebutat lo permés per evitar “de perturbacions cap als residents”. Aquí, organizan l’eveniment l’Ostal Basco de Madrid, lo departament de basco de l’Escòla Oficiala de las lengas e l’airal d’estudis bascos de l’Universitat Complutense.
 
Tanben a Pampalona la comuna a enebit que las edicions pels enfants se passen sus la calçada, en obligant aquestes de córrer suls trepadors.
 
 
Una marcha revendicativa e festiva
 
La Korrika (“en corrent”) es una marcha revendicativa que se debana en corrent pel Bascoat e endacòm mai en favor de la lenga basca. Lo promotor de l’iniciativa es l’associacion d’euskaltegis (escòlas de basco) AEK. La particularitat d’aquela marcha es que s’arrèsta pas per la nuèch. Dempuèi que sortís entrò la fin, la bandeiròla passa de man en man, de vila en vila, de vilatge en vilatge, sens s’arrestar a cap de moment. La primièra Korrika se tenguèt en 1980.
 
Al davant de la corsa, i va normalament la persona que pòrta lo testimòni. Cada quilomètre de la marcha, lo pòrta una persona o associacion que “crompa los quilomètres” per ajudar financièrament. Lo testimòni es fach d’un baston de fusta talhada, que se sèrva dempuèi la primièra edicion amb la bandièra basca.
 
La marcha se ten dins un grand ambient, amb de musica e d’animacions long de tot lo trajècte. Parallèlament, s’organiza divèrses eveniments culturals en favor de la lenga.


 

La denegación del permiso para la celebración de la #Korrika en Chamberí por “molestias a los vecinos” demuestra un cinismo vergonzoso y un sectarismo antidemocrático intolerable
¿Hasta dónde van a permitirle llegar @AlmeidaPP_⁩ ⁦@begonavillacis⁩? https://t.co/UD799O8paH

— Corazón Verde Chamberí (@verdechamberi) March 31, 2022

 

Aupa denok! Pese a las polémicas de ayer, la Korrika Txulapoa sigue en marcha! Mañana a las 10h den la Facultad de Filología de la UCM y a las 12:00 a la Euskal Etxea, Calle Jovellanos. Para apoyar, id allí. Pido difusión, mesedez. Gora Korrika! @aitormerino@Xlapitz@LQSomospic.twitter.com/Hp1ZlSmMp2

— Lander Arteaga E. (@ArteagaEgiluz) April 1, 2022