Sus son compte Facebook, Paolo Rondelli a el meteis afirmat que serà “probablament lo primièr cap d’estat membre de la comunautat LGBT”. Marco Tonti, responsable de l’associacion Arcigay en Emília-Romanha, la region italiana dins la quala cap Sant Marin, a saludat “un eveniment istoric”.

“Es lo primièr cap d’estat dobèrtament omosexual e militant dels dreches de la comunautat LGBT”, s’es felicitat. “I a de precedents demest los caps de govèrns e ministres mas es una primièra mondiala per un cap d’estat”, çò a assegurat.

Plusors govèrns son o foguèron dirigits per de personalitats declaradas omosexualas, demest las qualas Xavier Bettel, primièr ministre de Luxemborg dempuèi 2013, l’islandesa Johanna Sigurdardottir (2009-2013) e lo bèlga Elio Di Rupo (2011-2014).

De responsables politics italians participèron divendres a l’investidura dels dos capitani reggenti de la Serenissima repubblica di San Marino , dont la ministra de la justícia Marta Cartabia e la senatritz Monica Cirinnà, celèbra dins la peninsula per son engatjament en favor dels dreches de la comunautat LGBT. Remarquem que la republica de Sant Marin a per originalitat d’aver dos caps d’estat simultanèus, los capitanis regents, elegits pel parlament cada sièis meses, per de mandats que començan en abril o en octòbre. L’autre capitani regent es Oscar Mina.

Paolo Rondelli es “un òme d’una immensa cultura e d’una granda experiéncia diplomatica e politica. A luchat pels dreches de las femnas e de las personas LGBT a Sant Marin e pas solament”, çò a escrich Monica Cirinnà sus son compte Facebook.