Mos a deishat a 71 ans Carlos Barrera Sánchez, sindic d’Aran entre 1995 e 2007 e entre 2011 e 2019. Eth sòn mandat serà rebrembat per auer portat a Aran es quòtes mès nautes d’autogovèrn damb era Lei d’Aran de 2015, aprovada en gèr d’aqueth an peth Parlament de Catalonha, e tanben pera reconeishença der Institut d’Estudis Aranesi coma acadèmia e autoritat dera lengua occitana en Aran e Catalonha. Tanben ajudèc ara creacion de Jornalet e quitament collaborèc damb quauqui articles d’opinion enes prumèri ans d’aguest jornau.
 
Pendent eth periòde nomentat “transicion democratica espanhòla“, dempús dera mòrt deth dictator Francisco Franco, Barrera participèc ath movement sociau aranés Es Terçons  damb eth propòsit d’arrecuperar era memòria istorica e era arreconeishença dera singularitat politica d’Aran. Se presentèc as eleccions municipaus de 1979 per Unitat d’Aran (UA), partit qu’abandonèc quan era formacion politica passèc a integrar eth Partit des Socialistes de Catalonha (PSC).
 
Barrera siguec elegit sindic d’Aran peth prumèr viatge en 1995 jos era sigla de Convergéncia Democratica Aranesa (CDA) e governèc eth país occitan de cap de Garona enquia 2007, quan siguec remplaçat per Paco Boya. En 2011, que guanhèc es eleccions un aute còp e siguec sindic d’Aran enquia 2019. Aqueth an, anoncièc que deishaue era politica a causa des maus resultats obtengudi per CDA en aqueres eleccions a on CDA demorèc damb 4 conselhèrs generaus, deth temps qu’eth sòn rivau, eth socialista Paco Boya, n’obtenguec 9.
 
 
 
 
FM

 

Eth govèrn d’Aran decrète 3 dies de dò oficiau. Pendent aguesti dies, se suspen era celebracion d'actes oficiaus e es drapèus onejaràn a mieja asta coma mòstra de respècte enes dependéncies deth Conselh Generau d’Aran, atau coma enes corporacions publiques dera Val d’Aran.

— Conselh Generau d'Aran (@conselharan) April 7, 2022