La Comission Europèa prepausa als 27 estats de l’Union un nòu paquet de sancions infligidas a Russia que comprenga l’enebicion de las importacions de carbon rus, mas quite per ara las restriccions al petròli. La proposicion de l’executiu comunautari vòl tanben empachar l’accès dels vaissèls russes als pòrts de l’Union Europèa, mas amb d’excepcions pels produches essencials a l’agricultura e l’alimentacion e pels bens umanitaris.
 
Lo cinquen paquet de sancions enebís tanben las transaccions amb quatre bancas russas, dont VTB, la segonda pus granda del país. Brussèlas prepausa tanben que se pòsca pas importar de Russia de produches coma la fusta, lo ciment, de tecnologia, de liquor o de fruches de mar.
 
Lo chaple de civils a Bucha, al nòrd de Kyiiv, a esmoguda una partida considerabla de la comunautat internacionala que se mobiliza per sancionar Russia. Per exemple, l’Union Europèa e los Estats Units an reclamat que se metan en examen los crimes de guèrra perpetrats per las tropas russas. D’imatges per satellit publicats per The New York Times an revelat que maites cadavres èran abandonats per carrièras dempuèi mai de vint jorns, çò que desmentís la version russa, que nèga l’existéncia del masèl.