La familha de Samuel Paty, l’ensenhaire francés assassinat en octòbre de 2020, faguèt dimècres una denóncia contra los ministèris de l’Interior e de l’Educacion per “non-assisténcia a persona en perilh e non-empediment de crime”. La denóncia senhala de disfoncionaments imputables als agents dels dos ministèris, çò rapòrta Libération. “De fautas foguèron comesas tant del costat de l’Educacion Nacionala que del costat del Ministèri de l’Interior, sens las qualas Samuel Paty auriá pogut èsser salvat”, çò indiquèt l’avocat que representa los parents e las sòrres de l’ensenhaire assassinat.
 
La familha de l’ensenhaire acusa los servicis de l’intelligéncia franceses d’aver pas jamai considerat seriosament lo risc d’un atemptat. Acusa tanben lo rectorat de Versalhas d’aver pas pres pro de mesuras de proteccion. Mai globalament, denóncia las falhas dins lo tractament d’almens un senhalament clau, d’analisis erronèas e una inaccion fautiva.
 
Per la familha, entre lo 8 e lo 16 d’octòbre, los ensenhaires avián identificat una menaça grèva per l’integritat fisica de Paty e per la seguretat del collègi, mai que mai a causa de la mediatizacion de la menaça del paire d’una escolana suls rets socials qu’aviá publicat dos vidèos suls rets socials per criticar l’ensenhaire en raportant sas donadas personalas. La familha es convencuda que la vida de l’ensenhaire seriá salvada s’almens un o dos agents del Ministèri de l’Interior avián fach cas a la menaça.
 
Samuel Paty èra professor d’istòria-geografia. Aviá patit un secutament enòrme per aver mostrat de caricaturas de Maomet dins un cors sus la libertat d’expression abans que foguèsse assassinat d’un biais òrre lo 16 d’octòbre de 2020 a la sortida del collègi del Bois d’Aulne, dins la banlèga de París. L’agressor presumit, un gojat de dètz e uèch ans d’origina chechèna, la polícia lo tuèt per bala dins una vila vesina.