Accion dels activistas pel catalan contra dos restaurants de Barcelona que mesprèsan la lenga. Una seissantena d’activistas de Plataforma per la Llengua se mobilizèron lo 18 de febrièr passat per denonciar lo mancament als dreches lingüistics dels catalanofòns dins dos restaurants barceloneses.
 
L’associacion que se bat pel catalan causiguèt per l’accion dos restaurants que fan partida de grandas entrepresas amb pro de ressorsas per prepausar un servici als clients en catalan mas qu’o vòlon pas far. Pendent l’accion, se faguèt mai de 50 denóncias per mancament als dreches lingüistics e ara l’administracion catalana a entamenat lo procès de denóncia administrativa contra los dos establiments. Ara Plataforma per la Llengua espèra qu’aquelas doas societats rectificaràn e metràn a la disposicion dels clients la carta en catalan, coma o establís la lei en Catalonha.
 
La primièra accion se tenguèt al restaurant Five Guys. A partir de 20h, una cinquantena d’activistas intrèron gradualament dins lo restaurant en grops de dos o de tres personas, demandèron la carta en catalan e quand se lor disiá que i èra pas exigiguèron los fuèlhs de reclamacion, çò que l’establiment quitèt pas de refusar. Alavetz los activistas presentèron de formularis qu’eles meteisses portavan mas que los volián pas acceptar los emplegats. Enfin, los emplegats de l’establiment sonèron la polícia que, quand arribèt, diguèt a l’establiment que deviá acceptar aquels fuèlhs de reclamacion.

Lo segond restaurant èra lo Surf House. Aquí, una quarantena de personas assetats a diferentas taulas reclamèron la carta en catalan. A la diferéncia del primièr restaurant, si que foguèron acceptats los fuèlhs de reclamacion.
 
Plataforma per la Llengua a son sit web en quatre lengas, dont l'occitan.