La fièra Alimentària, tenguda a Barcelona del 4 al 7 d’abril, foguèt lo ponch de rescontre professional del Ret d’Aliments de Qualitat impulsat per l’Euroregion Pirenèus Mediterranèa (EPM), e serviguèt per enfortir las relacions transfrontalièras entre expèrts, productors e promotors dels produches amb de labèls DOP e IGP, valent a dire de manjar amb la reconeissença d’origina e de qualitat, de Catalonha, de las illas Balearas e de la region qu’a pres lo nom d’Occitània.
 
Demest las activitats realizadas, cal soslinhar lo primièr concors de cosina de la “Melhora recèpta euroregionala elaborada amb de produches DOP e IGP de las illas Balearas, de Catalonha e d’Occitània” que lo ganhèt lo jove cosinièr catalan Eric Montes, de Vilanova i la Geltrú. A la segonda plaça i aviá lo menorquin José María Borrás e Thomas Riquier, un dels cosinièrs del restaurant Vivants de Tolosa.
 
La jornada contunhèt amb una conferéncia d’un dels responsables de l’airal de mercats agroalimentaris de la Comission Europèa, Fabien Santini, suls circuits corts de comercializacion d’aqueles produches. Puèi, se faguèt una taula redonda sus las experiéncias toristicas que pòdon èsser utilas per la promocion dels produches locals, i foguèt present Xavier Bernard-Sans, secretari general de l’EPM, e i intervenguèron lo director de l’agéncia d’estrategia toristica de las illas Balearas, Xisco Mateu; lo director dels projèctes e estrategias toristicas innovantas de la direccion del torisme e de l’idroterapia de la region dicha Occitània, Igor Knibiehly, e la directritz generala  encargada del torisme a la Generalitat de Catalonha, Marta Domènech, que definiguèt la relacion entre torisme e gastronomia amb aquesta metafòra: “Nòstra cosina es nòstre païsatge dins un plat”.
 
 
Ret d’Aliments de Qualitat
 
Lo “Ret d’Aliments de Qualitat” a per tòca lo transferiment de coneissenças e de tecnologia, per l’enfortiment de l’ecosistèma innovant del sector agroalimentari a l’escala euroregionala, en de questions coma: l’impulsion dels circuits corts de comercializacion agroalimentària, la qualitat dels produches alimentaris, lo refortiment de la formacion dels joves dins los mestièrs de la restauracion o la promocion de la sobeiranetat alimentària. Aquela iniciativa foguèt un dels projèctes finançats amb lo fons Covid-19 autrejat per l’Euroregion Pirenèus-Mediterranèa per afrontar los efièches de la pandemia, e s’avièt en març de l’an passat. En tèsta i èra lo Cluster Biotecnologic e Biomedical de las illas Balearas, amb l’Institut Regional de la Qualitat Agroalimentària de la region Occitània, la societat publica Prodeca, del departament d’accion climatica, d’alimentacion e d’agenda rurala de la Generalitat de Catalonha, e la federacion catalana de DOP-IGP.
 
L’eveniment s’acabèt amb un dinnar de networking al taulièr Catalonia HUB, amb los expèrts, productors e promotors de produches labelizats DOP e IGP sortits dels tres territòris. Aqueles collectius professionals an la volontat d’enfortir las relacions en ret e de far emergir de nòvas collaboracions entre Catalonha, las illas Balearas e la region apelada Occitània en aquel sector estrategic, tant economicament coma per l’equilibri territorial d’aqueles tres territòris de la Mediterranèa.
 
 
 
 
EPM/Redaccion