Los partits politics istorics de França an pas solament patida una revirada electorala mas tanben financièra. Los Republicans, lo Partit Socialista e Euròpa Ecologia Los Vèrds arriban pas al 5% dels vòtes, e per tant recebràn pas pro d’argent per finançar lor campanha electorala. “Personalament, soi endeutada per un montant de cinc milions d’èuros”, çò a anonciat la candidata dels Republicans, Valérie Pécresse. Solament son miting al Zénith de París en febrièr passat li costèt 500 000 èuros, segon Capital. La situacion es tanplan marrida per Anne Hidalgo, candidata del Partit Socialista, que ten un deute d’8 milions d’èuros. Son partit avián demandat a las federacions que portèsson d’argent per finançar lor campanha après aver vendut, en 2019, lo sèti de Solférino a causa de la revirada de Benoît Hamon a la presidenciala anteriora. De son caire, l’ecologista Yves Jadot a entamenat una campanha per cobrir los còstes milionaris de sa campanha, ço rapòrta Vilaweb.
 
De lor latz, Philippe Poutou a despensat 770 000 èuros, Nathalie Arthaud 930 000 èuros e Joan de Lassala solament n’a despensat 240 000; per tant, eles auràn pas aqueles grèus problèmas financièrs.
 
Dins l’estat francés, s’un candidat despassa lo 5% dels vòtes, pòt percebre coma remborsament per la campanha fins al 47,5% del plafon de despensa qu’es de 16,8 milions. La sola condicion es que los comptes de la campanha sián validats pel Conselh Constitucional. Per contra, los qu’an mens del 5% dels vòtes, recebon solament un montant equivalent al 4,75% del plafond de despensa autorizada, es a dire, 800 423 èuros.
 
Una situacion similara la rescontrèt Sarkozy en 2012 quand entamenèt lo dich Sarkothon, una soscripcion populara qu’amassèt 11 milions d’èuros après la decision del Conselh Constitucional de rebutar sos comptes de campanha. La granda diferéncia es qu’alavetz l’UMP obtenguèt lo doble de vòtes que Los Republicans ara.
 
 
L’espèr de las legislativas
 
Las eleccions legislatiuas prometon ara d’èsser crucialas pels partits istorics endeutats. Percebràn una soma per cada vòte. En 2017,  èra d’1,42 èuro per vòte. Mas i a tanben una condicion: an d’obténer almens l’1% dels vòtes en cinquanta circonscripcions e cal que se respècte la paritat entre los candidats. Aquò pòt èsser una granda provision de fonzes o ben un desastre s’i arriban pas.
 
Pel vòte dels 12 e 19 de junh, cada candidat que sollicitarà un sèti coma deputat poirà despensar fins a 38 000 èuros. Aquel plafon aumentarà de 15 centims per estatjant de la circonscripcion. Cada candidat que superarà la taxa del 5% poirà tanben èsser remborsat per sas despensas de campanha, se sos comptes son validats per la Comission Nacionala dels Comptes de Campanha e Finançament Politic.